Astananyń Turǵyn úı qory «Baqytty Otbasy» baǵdarlamasy boıynsha turǵyn úı alýǵa joldama alý úshin ótinishter qabyldaýdy jalǵastyrýda, ol 31 shildede aıaqtalady (I kezeń).
Esterińizge sala keteıik, baǵdarlamaǵa qatysýshylar Turǵyn úı qurylys jınaq bankinen 20 jylǵa deıin jyldyq 2% mólsher boıynsha Nur-Sultannan turǵyn úı satyp alýǵa turǵyn úı qaryzdaryn alýǵa múmkindikteri bar. Nesıeniń eń joǵary somasy 15 mln.tg.
«Baqytty Otbasy» baǵdarlamasyna múgedek balalaryn tárbıelep otyrǵan, kóp balaly nemese tolyq emes otbasylar qatysa alady. Joǵaryda kórsetilgen sanattardyń biri boıynsha elordada turǵyn úı alýǵa kezekke úmitkerlerdi qoıý da mindetti shart bolyp tabylady.
Otbasynyń bir múshesiniń tabysy 42500 teńgeden aspaýy tıis. Turǵyn úıdi bastapqy jáne qaıtalama naryqta satyp alýǵa bolady.
Osy baǵdarlama boıynsha ótý úshin kelesi kezeńderden ótý kerek:
1) turǵyn úı qorynan joldama alý ( R. Qoshqarbaev dańǵyly, 39)
2) Alǵan joldamamen Turǵyn úı qurylys Jınaq bankine baryp tólemqabilettiligin rastaý
Bastapqy naryqty tańdaý kezinde qatysýshylar Jumyspen qamtý jáne áleýmettik qorǵaý basqarmasynda beriletin bastapqy jarnanyń bir bóligin jabý úshin 1 mln.teńge mólsherinde turǵyn úı sertıfıkattaryn ala alady. Qaıtalama naryqty tańdaǵan jaǵdaıda turǵyn úı qunynyń 10% bastapqy jarnasyn TQJB-daǵy shotqa engizgen jón.
Sonymen qatar, «Nurly Ertis» baǵdarlamasyna kóp balaly otbasylardy qabyldaý jalǵasýda. Onyń aıasynda Nur-Sultannan Ekibastuz qalasyna 105-ten astam astanalyq otbasy nemese 500-den astam adam kóshirildi.
Oǵan 3 jáne odan da kóp bala tárbıelep otyrǵan otbasylar qatysa alady. Qatysýshylarǵa Ekibastuz qalasynda aılyq tólemi sharshy metrine 99 tg bolatyn 2 jáne 3 bólmeli páterler beriledi. Baǵdarlama ortasha eńbekaqysy 120 myń teńgenini quraıtyn jumyspen qamtýdy kózdep otyr. Sonymen qatar balalar balabaqshaǵa tegin ornalastyrylady, sondaı-aq mektep formasy men kerek-jaraqtary beriledi. Baǵdarlama balalardy balabaqsha men 11 synypqa deıingi mektepte tegin tamaqpen qamtamasyz etýdi kózdeıdi. Balalarǵa jáne bir ata-ana úshin kóliktik jol júrý bıletteri de beriledi.
Páterler 5 jyl ótkennen keıin jekeshelendirý quqyǵymen bastapqy jarnasyz beriledi. Sondaı-aq, kommýnaldyq turǵyn úı qorynan turǵyn úıge muqtajdardy esepke qoıý, erli-zaıyptylardyń bireýiniń joǵary nemese kásiptik-tehnıkalyq biliminiń bolýy qatysý úshin mindetti shart bolyp tabylady.
Odan bólek «Eńbek» baǵdarlamasyna eki jáne odan da kóp balalary bar otbasylar qatysa alady. Sonymen qatar, qatysýshylardyń traktorshy, bas býhgalter, mehanızator, kamaz júrgizýshisi, kombaıner, dánekerleýshi, aýdarmashy, malshy, vetdáriger, psıholog, malshy, saýynshy, zootehnık, nefrolog-dáriger, kardıolog, otolarıngolog, onkolog, mammolog, zerthanashy, medbıke, muǵalimder men tárbıeshiler mamandyqtary boıynsha dıplomy bolýy tıis. Mundaı bilimderi bolmaǵan jaǵdaıda tegin oqý múmkindikteri qarastyrylǵan.
Baǵdarlama Soltústik Qazaqstan oblysynyń úsh aýdanynda: Ǵabıt Músirepov atyndaǵy, Maǵjan Jumabaev atyndaǵy, Mamlıýt aýdandarynda turǵyn úılerdi usynady. 70-ten 150 sharshy metrge deıingi turǵyn úıdiń alańyna baılanysty jaldaý aqysy 7000 teńgeden 14850 teńgege deıin ózgeredi. Sonymen qatar qonys aýdarýshylarǵa otbasynyń árbir múshesine 88374 tengeden bir rettik áleýmettik kómek beriletin bolady.