Oral qalasyndaǵy halyqaralyq áýejaı ǵımaratyn qaıta qurý jáne jańǵyrtý jumystary bastaldy. Jobanyń bastamashysy – «Oral» áleýmettik kásipkerlik korporasııasy bolsa, qajetti qarjyny óńirdegi eń iri Qarashyǵanaq kenishin ıgerýshi KPO.b.v kompanııasy bólip otyr.
– 2015 jyly ushyp-qoný jolaǵyna kúrdeli jóndeý júrgizilip, barlyq túrdegi qazirgi zamanǵy áýe kemelerin shekteýsiz qabyldaýǵa múmkindik týdy. Alaıda termınal ǵımaratynyń tozýy jáne tehnıkalyq bazanyń eskirýi áýejaıdyń jolaýshylar ótkizý qabiletin arttyrýǵa jáne jańa áýe baǵyttaryn ashýǵa múmkindik bermeıtin. Qarapaıym sózben aıtqanda, qonaqtardy qarsy alyp, shyǵaryp salǵan kezde áýejaıdyń qazirgi kórinisinen yńǵaısyzdanatynbyz, – dedi jańǵyrtý jumystarynyń bastalýyna oraı ótken saltanatty sharaǵa qatysqan oblys ákimi Ǵalı Esqalıev.
О́ńir basshysy aıtsa aıtqandaı, Oral qalasynyń áýejaı ǵımaraty Keńes ókimeti zamanyn eske túsiretin kóne ǵımarat bolatyn. Tipti toqyraý kezeńiniń kórinisin qaz-qalpynda saqtap qalǵan bul múıis 40-50 jyl burynǵy oqıǵalardy taspaǵa túsirýge taptyrmas dekorasııadaı edi. Áýejaı ǵımaratynyń irgetasy 1979 jyly qalansa, sodan beri kúrdeli jóndeý kórmepti. Mamandar «termınal 79%-ǵa tozyǵy jetken» degen sheshim shyǵarǵan. Áýejaıdyń «halyqaralyq» degen atyna zaty saı emes, jolaýshylarǵa qolaısyz, ınfraqurylymy nashar, shynynda da moraldyq hám materıaldyq jaǵynan ábden tozǵan bolatyn. «Qazaqstannyń batys qaqpasy» sanalatyn Oral qalasyna zamanaýı áýejaı qajettigi kópten aıtylyp júrgen edi.
QPO b.v. kompanııasynyń bas dırektory Edvın Blom jobanyń qarjysy áleýmettik mindettemeleri sheńberinde bólinip otyrǵanyn aıtady. Jobanyń quny – 2,4 mlrd teńge. Jańǵyrtý jumystaryn 2020 jyldyń sońyna deıin aıaqtaý josparlanǵan. Merdigeri – «KazConstructionGroup» JShS.
Qaıta jańartý nátıjesinde termınal aýdany qazirgi 4,5 myń sharshy metrden 7 myń sharshy metrge deıin keńeıedi. Sondaı-aq jolaýshylar sanyn jylyna 160-tan 350 myń adamǵa deıin ulǵaıtýǵa múmkindik beredi. «Oral» ÁKK» AQ dırektorynyń birinshi orynbasary Artýr Dosqalıevtiń aıtýynsha, jańǵyrtý jumystarynan keıin halyqaralyq baǵyttar sany kóbeıip, óńirdiń tranzıttik, týrıstik áleýeti arta túspek. Sondaı-aq termınaldyń tehnologııalyq jabdyqtary halyqaralyq qaýipsizdik jáne kedendik baqylaý talaptaryna sáıkes jańartylatyn bolady.
Batys Qazaqstan oblysy