Ǵ.Músirepov aýdanynyń jedel ýákilder esirtki tasymaldady degen kúdikpen 46 jastaǵy er adamdy ustady.
Esirtki qylmysyna qarsy is-qımyl basqarmasy bastyǵynyń mindetin atqarýshy polısııa maıory Ivan Terzıdıdiń aıtýynsha, jedel-izdestirý is-sharalaryn júrgizý barysynda «Jezqazǵan – Petropavl» avtojoly boıynda toqtatylǵan avtokólikti tintý barysynda ósimdik tektes zat salynǵan 4 qap jáne túıinshekter tabylǵan. Sot-hımııalyq zertteýdiń qorytyndysy boıynsha alynǵan zattar salmaǵy 80 keli 285 gramm keptirilgen marıhýana jáne 88,09 gramm gashısh bolyp shyqqan.
Atalǵan faktige qatysty qylmystyq is qozǵalyp, kúdiktige esirtki, psıhotroptyq zattardy ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý, ótkizý sekildi aıyptar taǵylyp otyr. Ýaqytsha ustaý oqshaýlaǵysyna qamalǵan onyń kinási dáleldense, on jyldan on bes jylǵa deıingi merzimge túrmege toǵytylýy múmkin.
Jyl basynan beri óńirdiń tártip saqshylary 200 keliden astam túrli esirtki zattaryn tárkiledi. Onyń 112 gramy – geroın.
Soltústik Qazaqstan oblysy.