Bıyl Almatyda jetinshi ret velosporttan Tour of Almaty eki kúndik velojarysy uıymdastyrylmaq. Atalǵan báseke qazirgi tańda Ortalyq Azııadaǵy eń iri velododaǵa aınaldy.
Sońǵy úsh jyldan beri Tour of Almaty halyqaralyq kásipqoı velojarysy eki kúndik bolyp ótkizilip jatyr. Sonyń arqasynda jarysqa qatysqysy keletin sportshylardyń sany da artýda. Endi Almatyǵa sprınterler de, taýǵa órmelegish veloshabandozdar da kele bastady.
30 tamyz kúni bastalatyn jarystyń birinshi kezeńi sprınterlerge arnalǵan. Alǵashqy kezeń 118 shaqyrymǵa sozylady. Al 31 tamyz kúni «Road to Medeu», ıaǵnı taýly kezeń. Bul kezeńde veloshabandozdar 160 shaqyrymdyq tasjoldy basyp ótedi.
Bıylǵy jarysqa Qazaqstannan úsh, Polsha men Malaızııadan eki, Fransııa, Reseı, Italııa, Latvııa, Shveısarııa, Japonııa, Shvesııa, Aýstrııa, Ázerbaıjan jáne Túrkııadan bir-bir komanda qatysýǵa nıet bildirip otyr.