О́tken jyly uıymdastyrylmaq bolyp, biraq túrli sebepterge baılanysty ótpeı qalǵan qazaqstandyq boksshy Gennadıı Golovkın (39-1-1, 35 KO) men ýkraınalyq Sergeı Derevıanchenko (13-1, 10 KO) arasyndaǵy jekpe-jek uzaq ýaqyt kelissózden soń aqyry ymyraǵa kelip, araǵa jyl salyp jekpe-jek ótkizýge ýaǵdalasty. Bul týraly keshe eki boksshy da ózderiniń áleýmettik jelidegi paraqshalarynda resmı túrde jarııalady.
5 qazanda (Nur-Sultan ýaqyty boıynsha 6 qazan) AQSh-tyń Nıý-Iork qalasyndaǵy Madison Square Garden arenasynda ótetin kezdesýde boksshylar IBF beldiginiń álem chempıony ataǵyn sarapqa salady.
Boks jankúıerleriniń esinde bolsa, byltyr Halyqaralyq boks federasııasy (IBF) qazaqstandyq boksshyǵa ýkraınalyq Sergeı Derevıanchenkony mindetti qarsylas ekenin atap, eki boksshynyń kezdesýin mindettegen bolatyn. Alaıda Gennadııdiń komandasy IBF uıymynan belbeýdi (sol ýaqytta otandasymyz IBF belbeýiniń ıegeri edi) qorǵaý merzimin keıinge shegerýge ruqsat surap, atalǵan uıymǵa 20 myń dollar ótemaqy tólegen-di.
Jekpe-jek ýaqyty belgilenip, kelisimshartqa qol qoıylǵannan keıin Golovkın de, Derevıanchenko da ádettegideı kezdesý týraly ózderiniń alǵashqy pikirlerin bildirdi.
Golovkın: «Bári biletindeı, ózimniń ekinshi úıim sanalyp ketken Madison Square Garden arenasyna oralatynyma qýanyshtymyn. 5 qazan kúni ol jerde keremet boks keshi ótedi degen senimdemin. Men árdaıym jankúıerlerime ózderi qalaǵandaı shoý kórsetip kelemin. Olar da sondaı jekpe-jek kórýge laıyqty jandar. Bul joly da jankúıerlerime qyzyqty boks keshin usynamyn. Tez arada DAZN arqyly bıg-drama-shoýda kezdesemiz. О́tkizip almańyzdar».
Derevıanchenko: «Gennadıı Golovkındi syılaımyn jáne oǵan qurmetpen qaraımyn. Sondaı-aq osyndaı ataqty qarsylaspen judyryqtasý múmkindigi ekiniń birine berile bermeıdi, sondyqtan aldaǵy aıqasta boksqa kelgendegi maqsatym – álem chempıony ataný úshin qolymnan kelgenin isteımin. «Medıson» men DAZN kórermenderi eki úzdik boksshynyń arasyndaǵy tamasha kezdesýge kýá bolmaq. Sondyqtan tezirek rıngke kóterilýge asyqpyn» dedi.
Aldyn ala málimet boıynsha, bul jekpe-jek úshin otandasymyz Gennadıı Golovkın DAZN strımıngtik servısimen kelisim boıynsha 100 mıllıon dollardyń bir bóligin ıelenedi. Orta esepen ol 15 mıllıon AQSh dollary kóleminde gonorar alýy múmkin. Sondaı-aq jarnama men translıasııadan túsken qarjyǵa da ıelik etedi.
Al Derevıanchenko Golovkınmen aıqasy úshin tek óziniń ǵana emes, búkil ýkraınalyq boksshylar arasynda rekordtyq gonorar almaq. Iаǵnı, ol bul jekpe-jekten 5 mıllıon AQSh dollarynan asa tabys tappaq. Derevıanchenko buǵan deıin 500 myń dollar kóleminde gonorar alǵan bolatyn.
S.Derevıanchenkonyń WSB jobasynda elimizdiń «Astana arlandary» boks klýbynda judyryqtasqany belgili.