Memleket basshysy 24 maýsymda Arys qalasynda bolǵan tótenshe jaǵdaı kezinde jáne qarý-jaraq qoımasyndaǵy jarylystyń saldaryn joıý barysynda erekshe kózge túsken elimizdiń azamattaryna memlekettik nagradalar tapsyrdy. «Aqorda» rezıdensııasynda ótken saltanatty jıynda 40 adam marapattaldy. Bul týraly Memleket basshysynyń baspasóz qyzmeti habarlady.
Qasym-Jomart Toqaev óz sózinde turǵyndardy qutqarýǵa jáne Arys qalasyn qaıta qalpyna keltirýge atsalysqan barlyq azamatqa rızashylyq bildirdi.
Prezıdent 24 maýsym halqymyzdyń taǵy bir synaqtan súrinbeı ótken kúni retinde tarıhta qalatynyn aıtyp, Arys turǵyndarynyń tynyshtyǵy buzylǵanymen, eldiń rýhy túspegenin aıtty.
– Qaıǵyly jaǵdaı eshkimdi beı-jaı qaldyrmady. Arys qalasyn búkil el bolyp qalpyna keltirdik. Buǵan Qazaqstannyń ár turǵyny úles qosty. Patrıotızm men shynaıy kómektiń osyndaı jarqyn úlgisiniń negizinde jastarymyzdy tárbıeleýimiz kerek, – dedi Memleket basshysy.
Qasym-Jomart Toqaev qazirgi ýaqytta nysandardyń 97 paıyzynyń qaıta qalpyna keltirý jumystary aıaqtalǵanyn, eń aldymen, kóp balaly otbasylardyń baspanalary qalpyna keltirilgenin habarlady. 1 qyrkúıek kúni 16 mektep 12 myń oqýshyny qabyldady, onyń 2,5 myńy birinshi synypqa barǵan búldirshinder.
Qazaqstan Prezıdenti sóziniń sońynda Arys oqıǵasy halqymyzdyń qıyn-qystaý kezdegi bekem birligi men yntymaǵyn kórsetkenin aıtty.
Shyn máninde, búgingi jıynǵa qatysyp otyrǵan azamattar – naǵyz batyrlar. Al, osy zalǵa kele almaǵandardyń bári ordendermen jáne medaldarmen marapattalatyn bolady, - dep qorytyndylady Memleket basshysy.