Mońǵolııa astanasy Ulanbatyrda Qazaqstannyń Mońǵolııadaǵy Elshisi Jalǵas Ádilbaevty senim gramotalaryn tabystaý úshin Mońǵolııa Prezıdenti Haltmaagıın Battýlga qabyldady. Bul týraly Syrtqy ister mınıstrliginiń baspasóz qyzmeti habarlady.
Kezdesý barysynda Mońǵolııa basshysy qazaq-mońǵol elderi arasynda qalyptasqan dostyq qarym-qatynastar men ózara senim ahýalyn, sondaı-aq, óńirlik jáne jahandyq kún tártibindegi negizgi máseleler boıynsha eki memlekettiń yntymaqtastyǵyn atap ótti.
Saýda-ekonomıkalyq yntymaqtastyq, kólik-logıstıkalyq, aýylsharýashylyq jáne mádenı-gýmanıtarlyq salalardaǵy ekijaqty yntymaqtastyqtyń ózekti, sondaı-aq, bolashaqtaǵy eń joǵarǵy jáne joǵary deńgeıdegi ózara saparlar máseleleri talqylandy.
H.Battýlga kezdesý sońynda ózara baılanystardyń odan ári nyǵaıa beretinine senim bildirip, Elshige dıplomatııalyq jumysta tabys tiledi.