Bizdiń óńirdegi «Sary-Bıdaıyq» ken ornynda áktas, Sháýkende qum, «Maısor» men «Qarasor» ken oryndarynda da qum jetedi. Budan basqa «Tyńqudyq», «Qumkól» kómir ken oryndary, Ekibastuzda, Qalqamanda, Aqsýda, Maı aýdanynyń aýmaǵynda kenishter, onyń ishinde «Kemertuz» kenishi bar. Ekinshiden, «Pavlodar ózen porty» AQ Ertis ózeniniń múmkindikterin arttyra túsýde.
Jalpy, osy tabıǵı resýrstar qanshalyqty tıimdi paıdalanylýda? Ken oryndaryn órkendetý boıynsha qandaı jobalar júzege asyrylýda, jer qoınaýyn paıdalanýshy óndiristerdiń jumys nátıjeleri qandaı deńgeıde?
«Egemen Qazaqstannyń» Pavlodar oblysyndaǵy tilshisi Farıda Byqaı oblystyq tabıǵı resýrstar jáne tabıǵat paıdalanýdy retteý basqarmasynyń basshysy Álibek Nesipbekovke:
– Siz buǵan ne deısiz?
– Jalpy, ken oryndarynyń jumysyn jandandyrý jaıy bizdiń basqarmanyń turaqty nazarynda. Oblystyń mıneraldy-shıkizat qoryn ıgerýdi damytý boıynsha 2013-2015 jyldarǵa arnalǵan is-sharalar jospary bekitildi. Búginde óńirdegi 35 paıdaly qazbalar ken ornynyń 17-si ıgerilýde. Olardyń 12-sinde tústi ken shyǵarylsa, qalǵandarynda kómir óndiriledi. Sonymen qatar, keń taraǵan paıdaly qazbalardyń 105 nysany tirkelgen. О́tken jyly ken oryndaryn ıgerýge salynǵan ınvestısııa kólemi – 183,6 mlrd. teńgeni qurady. Mysaly, «Pavlodar» áleýmettik-kásipkerlik korporasııasy» AQ jer qoınaýyndaǵy baılyqty iske jaratý boıynsha 19 jobany júzege asyrýda. Bul ıgilikke barlyǵy 17 mlrd. teńge ınvestısııa quıylmaq. Qurylys ındýstrııasy damyp, ónim alys-jaqyn shetelderge eksporttalmaq. Kórshiles Omby oblysynyń bizdiń óńirdiń kirpishine degen suranysy artyp otyr. Osy baǵytta «Qarasor ken baıytý kombınaty» kompanııasynyń negizinde jylyna 20-30 mln. kirpish shyǵaratyn zaýyt iske qosylady. Jergilikti kásiporyndar kirpish eksporttaý boıynsha reseılik kompanııalarmen kelisimsharttar jasasýda.
Al aldaǵy úsh jylda negizgi kúsh qatty paıdaly qazbalar ken oryndaryn ıgerýge baǵyttalady. Ol boıynsha «Sary-Bıdaıyq» ken ornynda áktas, Sháýken aýylynda qum ıgerý, «Maısor» men «Qarasor» ken oryndarynda kvars qumyn óndirý qolǵa alynady. Oblys aýmaǵyndaǵy «Tyńqudyq», «Qumkól» kómir ken oryndarynda barlaý jumystary júrgiziledi. Ekibastuzda, Qalqamanda kirpish shyǵaratyn óndiris oryndary ashylady.Sonymen qatar, Aqsý qalasy men Maı aýdanynyń aýmaǵynda ornalasqan «Kemertuz» kenishinen otqa tózimdi materıaldar shıkizaty óndiriletin bolady. Ertis ózeni arqyly aýyr júk tasý tasymaldaýdyń ózge túrlerine qaraǵanda arzan ári tıimdi. Qıyrshyq tasty iri kólemde Reseıge ótkizý óńir ekonomıkasyna, jergilikti óndiris oryndaryna paıda ákeledi.
Pavlodar oblysy.