Elbasy Nursultan Nazarbaev «Qazaqstan-2050» Strategııasynda qalyptasqan memlekettiń jańa saıası baǵytyn anyqtap bergeni belgili. Sonymen birge, bul asa aýqymdy strategııalyq qujatta memlekettiń odan ári damýyndaǵy ulan-ǵaıyr mindetter aıqyndaldy. Sondaı-aq, Memleket basshysynyń osy jolǵy Qazaqstan halqyna Joldaýyn Prezıdenttiń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty keń pishindi, tereń mazmundy maqalasymen de baılanystyra qaraı alamyz. Olaı bolatyn sebebi, atalǵan maqalada da strategııalyq jáne taktıkalyq turǵydaǵy mindetter jan-jaqty qamtyldy. Osynaý irgeli qujattar elimizdegi úkimettik emes uıymdar (ÚEU) úshin de uzaq jyldarǵa arnalǵan is-qımyl baǵdarlamasyna aınalyp otyr.
Oral qalasyndaǵy «Artý» qoǵamdyq birlestiginiń tóraǵasy Baýyrjan TUMANOVPEN áńgimemiz osyndaı baǵytta órbidi.
– Baýyrjan Qanatbaıuly, Joldaýdyń árbir taraýy elimizde quralǵan ÚEU-nyń ekinshi tynysyn ashýǵa alǵyshart jasaǵany aıqyn baıqalady. Iаǵnı, Elbasy munda barsha qazaqstandyqtardy qoıylǵan mindetterdi júzege asyrý úshin oǵan belsendi túrde qatysýǵa shaqyrdy. Buǵan qandaı oı-pikir qosa alasyz?
– Durys aıtasyz, máseleniń osylaı qoıylýynyń ózi kez kelgen úkimettik emes uıymnyń tabıǵaty men bitim-bolmysyna tolyq sáıkes keledi. Olaı bolatyn sebebi, ÚEU-nyń o bastaǵy mıssııasy qoǵam músheleri qajet etip otyrǵan talaptar men naqty problemalardy sheshýge yqpal jasaýdan týyndaıdy. Bir sózben aıtqanda, bul qoǵamnyń ózara úılesimdi damýyna jol ashý degen sóz. Atap aıtqanda, biz aldaǵy kezeńde seriktestik, jaýapkershilik, ujymshyldyq sekildi oń, jaǵymdy qundylyqtardy turmys-saltymyzǵa berik engizip, odan ári tereńdete alsaq qoǵamnyń úılesimdi damýy úǵymynyń ózi de osy túsinikterden qashyqqa ketpeıdi. Osy arqyly bolashaqqa degen senimdi de nyq qalyptastyrýǵa bolady. Qazaqstandyq patrıotızmdi damytý máselesine de osyndaı ólshemmen qaraı alamyz.
Myqty ári úlken bıznespen áli de bolsa jan-jaqty damyp kete qoımaǵan qoǵamnyń arasyndaǵy úılesimsizdik pen dısbalans moraldyq qundylyqtar men ar-namystyń sharasyz túrde kommersııalanýyna ákelip soqtyrmaı qoımaıdy. Iаǵnı, qoǵamda satylmaıtyn eshteńe joq, bári de satylady degen uǵym men túsinistiktiń paıda bola bastaýy oń qubylys pen jaqsylyqtyń nyshany bola almaıdy. Mundaı teris kózqaras jaǵdaıynda shekten shyqqan arsyzdyq kórinisteri beleń alýy ábden múmkin. Onyń nátıjesinde tek bıznes qana emes, sonymen birge, barlyq qoǵam zardap shegedi. Arsyzdyq pen jemqorlyq egiz, tórkindes uǵymdar. Osynda aıtylǵan ekinshi dert pen indetti Memleket basshysy ulttyq qaýipsizdigimizge tikeleı tónetin qater dep ataýy tekten tek bolmasa kerek.
Joldaýdaǵy: Memlekettilikti odan ári nyǵaıtý jáne qazaqstandyq demokratııany damytý» atty taraýda Nursultan Ábishuly: Azamattardyń jergilikti jerdegi ózekti máselelerdiń sheshimin tabýyna belsendi túrde aralasatyn jáne jergilikti bılik organdarynyń qyzmetin baqylaıtyn ýaqyty jetti dep taıǵa tańba basqandaı atap kórsetti. Mine, jańa Joldaý men ÚEU arasyndaǵy úndestiktiń basty kórinisi osynda. Elbasy atap kórsetkendeı ÚEU-nyń búgingi basty baǵdary dál osy maqsattarǵa baǵyttalsa, odan tek utady. Qazaqstan azamattarynyń árqaısysy óz aýmaǵy men óz memleketiniń qojaıyny ekeni anyq. Mine, dál osy aqıqatty otandastarymyz sana sezimderine sińire alsa – úlken olja sol bolar edi. Bul jalpy adamzattyq demokratııa talaptaryna da sáıkes keledi. О́ıtkeni, biz bárimiz – qoǵam men jurtshylyq bir-birimiz úshin jaýapkershilik arqalaıtynymyzdy umytpasaq eken. Sonymen birge, óz kezeginde bılik pen halyq Elbasy tujyrymdap bergendeı memlekettiń damýy men taǵdyry jónindegi jaýapkershilikti teń bólisse, sol memlekettiń bolashaǵy da solǵurlym senimdi ári jarqyn.
Osylaı bolýynyń ózi de tabıǵı ári zańdyq turǵydan týyndaıdy. Birinshiden, Konstıtýsııada kórsetilgen tarmaqtarǵa sáıkes halyq eldegi bıliktiń birden bir qaınar kózi bolyp tabylady. Osy yńǵaımen sóz sabaqtasaq halyq bılikte qoǵamdyq jáne úkimettik emes uıymdar retinde tolyqtaı ári tikeleı qatysa alady.
Ekinshiden, búgingi kúni ár aımaq pen oblystyń, ár qala men aýdannyń, ár eldi mekenniń, aýyldyń tabıǵı ári áleýetti resýrstaryn ornyqty jáne tıimdi túrde paıdalana bilýdiń mańyzy aıryqsha. Bul óte kinámshil, júrekke jaqyn alatyn másele. Sondyqtan ony tek qana jergilikti turǵyndardyń kelisimimen ári kómegi