Densaýlyq saqtaý mınıstrliginiń alqa otyrysynda mindetti áleýmettik medısınalyq saqtandyrýǵa daıyndyq jumystary talqylandy. Esterińizge sala keteıik, 2020 jyldyń 1 qańtarynan MÁMS tolyq iske qosylady. Bul týraly mınıstrliktiń baspasóz qyzmeti habarlady.
Alqa otyrysyna Senat pen Májilistiń depýtattary, DSM Qoǵamdyq keńesiniń ókilderi, medısınalyq qyzmettiń sapasy boıynsha birikken komıssııanyń, bıznes keńestiń músheleri, oblystardyń, respýblıkalyq mańyzy bar qalalardyń jáne Astanadaǵy Densaýlyq saqtaý basqarmasynyń, TKQSBK, MÁMSQ, REDO aımaqtyq fılıaldarynyń, vedomstvoǵa qarasty uıymdardyń basshylary qatysty.
Medısınalyq saqtandyrý Qory Basqarmasynyń tóraǵasy Aıbatyr Jumaǵulov densaýlyq saqtaý salasyn qarjylandyrý kólemi aıtarlyqtaı artqanyn aıtty. Máselen, 2020 jyly ambýlatorııalyq-emhanalyq kómekti qarjylandyrý 78%-ǵa ósedi, ıaǵnı 740,9 mlrd teńge bólinedi, konsýltasııalyq-dıagnostıkalyq qyzmetterge - 169 mlrd teńge qarastyrylǵan, onyń ishinde 18 mlrd teńge mektep medısınasyna baǵyttalady, emhana deńgeıinde medısınalyq ońaltýǵa -16,6 mlrd teńge bólinedi, TMKKK sheńberinde jáne MÁMS júıesi boıynsha ambýlatorııalyq dári-dármekpen qamtamasyz etý 2 ese artady da, jalpy shyǵyn 197 mlrd teńge jetedi.
Jalpy, 2019 jyly halyqqa medısınalyq kómek kórsetý bıýdjeti MÁMS esebinen 51%-ǵa nemese 580 mlrd teńgege ósti.
Sondaı-aq medısınalyq uıymdardy tehnıkamen jabdyqtaý, ınfraqurylym jáne kadrmen qamtamasyz etý máselesine nazar aýdaryldy.
Alqa jıynynda densaýlyq saqtaý júıesin sıfrlandyrýǵa jáne medısınalyq aqparattyq júıelerdi ıntegrasııalaýǵa erekshe basymdyq berildi.
Densaýlyq saqtaý vıse-mınıstri Oljas Ábishev medısınalyq uıymdar kompıýterlik tehnıkamen jáne ınternetpen 100% aýdandyq deńgeıde qamtamasyz etilgenin aıtty.
Búginde elektrondyq densaýlyq pasporty, ambýlatorlyq kartalar, dıspanserlik esepke alý tolyq sıfrlandyrylǵan.
Densaýlyq saqtaý basqarmasynyń basshysy Erjan Nurlybaev Qaraǵandy oblysyndaǵy qanatqaqty jobanyń nátıjesin qorytyndylaı kele, óńirde barlyq medısınalyq uıym biryńǵaı medısınalyq aqparat júıege kóshkenin jetkizdi. Sonymen qatar aýyldardaǵy 85 medısınalyq pýnkt spýtnıktik baılanys arqyly ınternetke qosylǵan.
Erjan Nurlybaev ońaltý qyzmetteri 1,5 esege, kúndizgi stasıonarda medısınalyq kómek 1,2 esege, konsýltasııalyq-dıagnostıkalyq qyzmetterdiń kólemi 2 esege artyp, qymbat dıagnostıka (KT jáne MRT) sany tamyz aıynda 1265-ten qarasha aıynda 3885-ge deıin óskenin atap ótti.
Vıse-mınıstr Lıazat Aqtaeva MÁMS engizilgen soń, alǵashqy aılarda aldymyzdan shyǵýy múmkin 9 táýekeldi atap ótti: saqtandyrylmaǵan azamattar, qorǵa turaqsyz tólem jasaıtyn jumys berýshiler, óńirlerdegi ózin-ózi jumyspen qamtyp júrgen adamdar jáne biryńǵaı statıstıkalyq esep júrgizý. Medısınalyq saqtandyrý qory osy qaýip-qaterdi sheshýdiń tıimdi ssenarııleri men tetikterin ázirledi. Mysaly, jeńildik jasalǵan sanattaǵy azamattardyń saqtandyrý mártebesi belgisiz bolǵan jaǵdaıda, jeńildik mártebesin rastaıtyn qujat, stýdenttik bılet, týý týraly nemese zeınetaqy kýáligin kórsetse boldy.
О́zin-ózi jumyspen qamtyǵan adamdar arnaıy termınal arqyly medısınalyq saqtandyrý qoryna tólem jasaıdy jáne birden saqtandyrylǵan mártebesin alyp, MÁMS júıesine jyldam qosyla alady.
MÁMS Qorynyń basshysy A. Jumaǵulov jumys berýshiler turaqty tólem jasaý úshin salyq organdary baqylaýdy kúsheıtetinin eske saldy.
Sondaı-aq vıse-mınıstr medısına qyzmetkerlerin TMKKK jáne MÁMS paketterin, ishki bıznes-prosesterdi bilýge oqytýdy jalǵastyrý qajettigin atap ótti.
Mınıstr alqa otyrysyn qorytyndylaı kele, medısınalyq saqtandyrýdy engizýge daıyndyq deńgeıin joǵary baǵalady.
Vedomstvo basshysy aımaqtyq densaýlyq saqtaý basqarmalaryn qormen birlesip, jetkizýshi medısınalyq mekemelerge menshigine qaramaı 2020 jyly medısınalyq qyzmetterdi obektıvti jáne tıimdi bólýge shaqyrdy.
- Medısınalyq kómek kórsetý barysynda daýly jaǵdaılar kezdesse, másele pasıenttiń paıdasyna sheshilýi tıis, - dedi Eljan Birtanov.
Ol densaýlyq saqtaý basqarmalary men MÁMSQ fılıaldarynyń basshylarynan medısınalyq uıymdardy jańa júıege daıyndap, ásirese medısına qyzmetkerlerin MÁMS boıynsha jumys isteýge oqytý sharalaryna erekshe nazar aýdarýdy talap etti.