Osy aptada Astanada erler arasynda Challenger ATP jáne áıelder arasynda ITF serııasynda tennısten Qazaqstan Respýblıkasy Prezıdentiniń Kýbogy jolyndaǵy halyqaralyq týrnır bastaldy.
Jyl saıyn ótetin bul týrnırge bıyl da kóptegen elderden ókilder keldi. Sonyń ishinde Dýdı Sela (Izraıl, ATP reıtıngisinde 88-oryn), Teımýraz Gabashvılı (Reseı, 137), Ivan Sergeev (Ýkraına, 177), Konstantın Kravchýk (Reseı, 179), Marsel Ilhan (Túrkııa, 180), Marııa Joao Kohler (Portýgalııa, WTA reıtıngisinde 106), Lýksıka Kýmkým (Taıland,107), Nına Bratchıkova (Reseı, 139), Tamarın Tanasýgarn (Taıland, 165) jáne Nadıa Kıchenok (Ýkraına,171) óz elderiniń namysyn qorǵaýda.
Jalpy, týrnırge qatysýǵa 25 eldiń tennısshileri nıet bildiripti. Barlyǵy 64 sportshy. Olar erler men áıelder jarysyna teń bólingen. О́tken jyldardaǵy týrnırlerge qaraǵanda, bul az emes. Al bizdiń elden Andreı Golýbev, Mıhaıl Kýkýshkın, Denıs Evseev, Tımýr Habıbýlın, Alekseı Nesterov, Saǵadat Aıap, Serijan Esenbekov, Dmıtrıı Popko, Zarına Dıas, Kamıla Kerimbekova, Ksenııa Pervak pen basqa da jas tennısshiler qatysýda.
Týrnırdiń jalpy júlde qory – 225 000 AQSh dollary. Osy aqshanyń 18 000-ǵa jýyǵy jeńimpazǵa beriledi. Bul somadan bizdiń eldiń ǵana emes, basqa elderdiń de úmittenip otyrǵan tennısshileri bar. Máselen, ızraıldik Dýdı Sela, reseılikter Teımýraz Gabashvılı, Konstantın Kravchýk, al áıelder arasynda portýgalııalyq Marııa Joao Kohler sııaqty sportshylar jeńimpaz atanýǵa baryn salatyny anyq. Bizden jeńimpaz bolýǵa erler arasynda ATR reıtıngisinde 141-orynda turǵan Andreı Golýbev pen elimizdiń nómiri birinshi raketkasy Mıhaıl Kýkýshkınniń, áıelder arasynda Ksenııa Pervaktyń múmkindikteri bar. Osy týrnırdi Golýbev 2008 jáne 2009 jyldary eki ret utyp alǵan bolatyn. Al Kýkýshkın 2001 jyly jeńimpaz atanǵan. Endi bıyl ekeýiniń de baby men baǵy kelisse, taǵy da kýbokty basyna kóteredi dep oılaımyz.
Ázirge ekeýi de alǵashqy kezdesýlerin sátti bastap otyr. Týrnırdiń birinshi kúni olar otandastary Saǵadat Aıap pen Serijan Esenbekovti jeńip, kelesi aınalymǵa shyqty. Áıelder arasynda Ksenııa Pervak ta ózinen tájirıbesi azdaý Kamıla Kerimbaevany eki sette 6:2, 6:0 esebimen utyp, kelesi kezeńge joldama aldy. Endi ol ekinshi kezeńde fransýz Alıze Lımmen kezdesedi.
Týrnır kún saıyn saǵat 10.00-den bastap «Dáýlet» Ulttyq tennıs ortalyǵynyń ashyq korttarynda ótýde. Fınaldyq jáne jartylaı fınaldyq kezdesýler senbi jáne jeksenbi kúnderi saǵat 12.00-ge belgilengen.
Dastan Kenjalın,
«Egemen Qazaqstan».