Qasym-Jomart Toqaev óziniń Germanııaǵa jasaǵan resmı saparynyń ekinshi kúngi baǵdarlamasynyń aıasynda nemis kompanııalarynyń basshylarymen birneshe kezdesý ótkizdi. Bul týraly Aqordanyń baspasóz qyzmeti habarlady.
«Baumann Gmbh» kompanııasynyń bas dırektory Robert Baýmannmen kezdesýde Almaty oblysyndaǵy agroónerkásip kesheni salasyndaǵy ınvestısııalyq jobalardyń júzege asyrylý máseleleri talqylandy. Kásipker Qazaqstanda qoı etin óndirý jumystaryn qalaı jolǵa qoıǵanyn aıtyp, óz bıznesin odan ári damytý jónindegi josparyn ortaǵa saldy.
Qazaqstan Prezıdenti bul jobaǵa oń baǵasyn berip, memlekettik qurylymdardyń jan-jaqty qoldaý kórsetetinin atap ótti.
– Qoı sanyn jylyna 750 myńǵa jetkizemiz degen bıik maqsat qoıyp otyrsyzdar. Memleket basshysy retinde sizdiń Qazaqstandaǵy jobańyzǵa oń baǵa beremin. Sizderdi odan ári órkendeı berýge shaqyramyn. Týyndaýy múmkin máselelerdi sheshý úshin nemis bıznesimen yntymaqtastyq ornatý jóninde jumys toby quryldy. Ony Premer-Mınıstrdiń orynbasary basqarady, – dedi Qasym-Jomart Toqaev.
Memleket basshysy halyqaralyq bıznesti damytý jónindegi «Deutsche Bahn AG» kompanııasynyń dırektory Nıko Varbanoffpen jáne ınfraqurylym jónindegi basqarma múshesi Ronald Pofallmen áńgimelesý barysynda kólik salasynda yntymaqtastyq ornatý máselesin talqylady. Atap aıtqanda, Qazaqstandaǵy temirjol jolaýshylar tasymalynyń sapasyn tıisti deńgeıge kóterý, ınjınırıngtik jáne konsaltıngtik qyzmetter kórsetý máseleleri qarastyryldy.
Sonymen qatar Qasym-Jomart Toqaev «Volkswagen AG» kompanııasynyń syrtqy baılanystar jónindegi bas dırektory Iens Hanefeldpen kezdesip, ınvestısııalyq yntymaqtastyq máselesin talqylady.
– Men Germanııaǵa eki el arasyndaǵy baılanystarǵa dáneker bolý úshin keldim. Bizge sizderdiń ınvestısııalaryńyz ben bızneske qatysýlaryńyz qajet. Keshe Germanııa basshylyǵyna bizdiń ekonomıkamyzdaǵy nemis ınvestorlarynyń sanyn arttyrǵymyz keletinin ashyq aıttym, – Qazaqstan Prezıdenti.