«Baıqońyr» ÁKK AQ tóraǵasynyń orynbasary Eskendir Seıdahanov ǵaryshtan munaı kenishin barlaý máselesin kóterdi. Bul týraly oblys ákiminiń baspasóz qyzmeti aımaqtyń áleýmettik-ekonomıkalyq damý baǵytyn talqylaýǵa arnalǵan ákimdik apparaty otyrysyna silteme jasap habarlady.
E. Seıdahanovtyń málimdeýinshe, aımaqta ekonomıkalyq áleýetti arttyrýdyń rezervteri az emes. Máselen, vanadıı men sırek kezdesetin metaldardy óndirýdi retke keltirý qajet. Biz qazir álem boıynsha eń sapaly ferrosılısıı óndirýdi meńgerdik. Sondyqtan ózge ónimderdi de el ıgiligine jaratý maqsatymen ınnovasııa jáne nanotehnologııalar ortalyǵyn qurý qajettigi alǵy kezekke shyǵyp otyr. Endi munaıdy Deep Vision noý-haý tehnologııasynyń kómegimen tereńnen óndirýdi qolǵa alyp, Ýkraınanyń «Geofızıka jáne Jer problemalary» ınstıtýty ǵalymdarymen birge ǵaryshtan munaı kenishin barlaý isin júrgizýimiz kerek.
Jıynda oblystyń klımattyq ahýalyn jaqsartýǵa septigin tıgizetin jel, gıdro jáne kún elektr stansalaryn salý úshin ınnovasııalyq sarapshylar tobyn qurý máselesi de qozǵaldy. Bul taqyrypqa mańyz berilýiniń sebebi – osy óńirde bir jyldyń 300-den asa kúninde aýa raıy ashyq bolyp turady. Sondyqtan kún sáýlesin balamaly qýat kózi retinde paıdalanýdyń múmkindigi bar.
Aksıonerlik qoǵam tóraǵasy orynbasarynyń kelesi usynysy Qytaıdyń Harbın qalasynyń oqymystylarymen birge mal jáne egin sharýashylyqtaryna qajetti tehnologııalardy engizýge baılanysty aıtyldy. Oblys ákimi Qyrymbek Kósherbaev osy jáne joǵaryda aıtylǵan usynystardy pysyqtaı kelip, naqty nátıje beretin jobalardy júzege asyrý qajettigin aıtty. Al osy isterdi bir arnaǵa toǵystyrý maqsatynda kásipkerlik jáne týrızm, syrtqy baılanystar jáne ındýstrııaldy-ınnovasııalyq damý basqarmalary qurylady. Otyrysta sondaı-aq tıisti salalar basshylaryna basqarma basshylarymen birge metallýrgııalyq klasterdi damytý tujyrymdamasyn ázirleý jáne Harbın ǵalymdarymen birlese jobalardy júzege asyrý jónindegi kelisimge qol jetkizý tapsyryldy.
Ámirhan Almaǵanbetov,
«Egemen Qazaqstan».