Úmitkerlerdi usyný aıaqtaldy

Qazaqstan Respýblıkasynyń aýdandyq mańyzy bar qalalary, aýyldyq okrýgteri, aýyldyq okrýgtiń quramyna kirmeıtin kentteri men aýyldary ákimdigine kandıdattardy tirkeý aıaqtalǵany týraly Ortalyq saılaý komıssııasynyń baspasóz qyzmeti habarlady.

24 shildede Qazaqstan Respýb­lıkasynyń aýdandyq mańyzy bar qalalary, aýyldyq okrýgteri, aýyl­dyq okrýgtiń quramyna kirmeıtin kentteri men aýyldary ákimdigine kandıdattardy usyný aıaqtaldy.

Aýdandyq jáne qala­lyq aýmaqtyq saılaý komıssııa­lary­nyń usynǵan derekterine sáıkes, respýblıka boıynsha usynylǵan 7173 úmitkerden ákimdikke kandıdattar retinde 7018 adam tirkeldi.

Saılaý naýqanyna qatysqan kan­dıdattardyń sapalyq quramyn­­da túbegeıli ózgerister bol­­ǵan joq.

Usyný aıaqtalǵannan keıin 46 kandıdat jeke ótinishteri boıynsha óz kandıdatýralaryn alyp tastady.

Aýmaqtyq saılaý komıs­sııa­larynyń sheshimi boıynsha 55 kandıdatty tirkeýden bas tartyldy. Tirkeýden bas tar­týdyń negizgi sebebi atalǵan kan­dıdattardyń 2013 jylǵy 24 sáýirde Qazaqstan Respýblıkasy Prezıdentiniń Jarlyǵymen bekitilgen Ákimderdi saılaý qa­ǵıdalarynyń talaptaryna sáıkes kelmeıtindigi bolyp tabyldy.

Tirkeýden keıin 51 kandıdat­ shyǵyp qaldy. Olardyń 15-i óz kandıdatýralaryn jeke ótinish­te­ri boıynsha alyp tastady. 36 kandıdat aýmaqtyq saılaý komıs­sııalarynyń sheshimi boıynsha olardyń kiris jáne múlik týraly usynǵan málimetteriniń sáıkes emestigin salyq organdarynyń anyqtaýyna baılanysty alynyp tastaldy.

Qazirgi ýaqytta barlyq tir­kelgen kandıdattar saılaý­ aldyndaǵy úgitke kirisýge qu­qyly.

Ol tańdaýshylarmen jınalystar men kezdesýler ótkizý, sondaı-aq baspa jáne ózge de úgit materıaldaryn shyǵarý jáne taratý arqyly júzege asyrylady.

Árbir kandıdat ózine saılaý naýqanyn jáne saılaý aldyndaǵy úgitti júrgizýge kómektesetin sany beseýden aspaıtyn senim bildirilgen adamdary bolýyna quqyly.

Máslıhat depýtaty, saılaý komıssııasynyń múshesi nemese saıası memlekettik qyzmetshi bolyp tabylmaıtyn Qazaqstan Respýblıkasynyń azamaty kan­dıdattyń senim bildirilgen adamy bola alady.

Kandıdattyń senim bildirilgen adamdary aýdandyq (qalalyq) saılaý komıssııasynda tirkelýi jáne tıisti qujattary bolýy qajet.

Kandıdattarǵa bıýdjetten bólinetin qarajattan basqa, olar­dyń árqaısysy úgit naýqanyn belgilengen tártippen qurylǵan óz saılaý qory qarajatynan qar­jylandyrýǵa quqyly.

Kandıdattyń saılaý qorynyń mólsheri 1 399 500 teńgeden aspaýy qajet.

Qaǵıdalarǵa sáıkes, saılaý aldyndaǵy úgit jergilikti ýaqyt boıynsha saılaý qarsańyndaǵy kúni nól saǵatta aıaqtalady.

«Egemen-aqparat».