Biz osydan birqatar ýaqyt buryn qazirgi kúnderi tyńdarman súısinip tyńdaıtyn jańa qazaq ánderin anyqtaý maqsatynda oqyrman arasynda saýalnama júrgizip kórgen edik. Mundaǵy maqsat ánsúıer qaýymnyń súıispenshiligine bólenip júrgen osyndaı hıt-ánderdiń ózin de, týyndynyń avtorlary men oryndaýshylaryn da jurtshylyqqa tanystyryp, olarǵa qatysty keıbir derekterdi usynyp otyrý bolatyn.
Osy suraý salýdyń qorytyndysynda birinshi oryndy jas ánshi Álııa Ábikenovanyń oryndaýyndaǵy kompozıtor Beket Esentaevtyń «О́mirge saýal» dep atalatyn týyndysy talassyz jeńip aldy. Osyǵan oraı biz án avtorynyń búginde aramyzda joqtyǵyna baılanysty, onyń ólmes týyndysyn ózegi talǵansha ónershil jurtqa jetkizip júrgen talantty ánshiniń ózimen suhbat qurdyq. Búginde Taldyqorǵan qalasynda turatyn, osyndaǵy Súıinbaı atyndaǵy fılarmonııada qyzmet etetin Álııamen telefon arqyly shuǵyl habarlasyp, kópshilikti tolǵandyryp júrgen 4 suraqqa jaýap alyp úlgerdik.
Sonymen, sizderdiń nazarlaryńyzǵa endi osy shaǵyn suhbatpen birge, onyń oryndaýyndaǵy «О́mirge saýal» ánin de usynamyz. Al eń sońynda ánniń mátini berilip otyr.
-Álııa, siz qazir oryndap júrgen «О́mirge saýal» áni shyn máninde de halyqtyń qalyń kópshiligi súısine tyńdaıtyn hıt-áýenderdiń birine aınalyp otyr. Jurtty tyńdatyp qana qoıa salmaı, qatty oılandyra alatyn bul ánmen qalaı jáne qashan tabystyńyz?
-«Jaqsy ándi tyńdasań janyń erip, jabyrqaǵan kóńiliń kóteriler» dep aqyldyń aqyny - Abaı atamyz jyrlaıdy. «О́mirge saýal» áni qulaqtan kirip, boıdy alar jaqsy ánderdiń biri ári biregeıi desem artyq aıtqanym emes. Ándi men alǵash ret osydan úsh jyl buryn ónerdegi aǵam Beket Esentaevtyń oryndaýynda tyńdaǵan sátte júregim qobaljyp, kóńilim alaburtyp, erekshe tebirengen edim. Beket aǵa únemi gıtaramen oryndaıtyn, ándi jan dúnıesimen berile shyrqaǵanda, kózine jas tolyp, ishki jan aıqaıyn syrtqa áýenmen shyǵarǵandaı kúı keshetin. Biraq men sol sátterde ánniń qudiretine mán bermeppin-aý. «Aǵa, qulazymańyzshy» dep jubatyp qana qoıatynmyn. Ol kisi óte talantty, uıań, qarapaıym, salıqaly, salmaqty jan bolatyn. Ánderin eshkimge «aıtshy» dep usynbaıtyn. О́kinishke qaraı, Beket aǵamnan aırylyp qaldyq. Artynda máńgi ólmeıtin ánderi qaldy. Bizden alystady, saǵymǵa aınaldy. Ol kúnnen-kúnge alystaǵan saıyn, saǵynyshymyz onyń ánimen qaýyshtyra bastady. О́zime de oı salǵan osy ándi oryndaýdy paryzym dep sanadym. Aǵanyń oryndaýyndaǵy ánderdi qaıta-qaıta tyńdap otyryp, án ózime qatty unap, repertýaryma engizdim. Kózi tirisinde «Meniń ánderimniń kez-kelgenin oryndaı ber» dep aıtýshy edi, sol usynysy men úshin amanattaı kórindi. О́nerin baǵalaýshy retinde Beket Esentaevtyń ánderin jınaqtap úntaspa shyǵardym. Beınebaıan túsirdim. Kóptiń kóńilinen shyǵyp, yqylastaryn bildirýde.
Beket aǵamyzdyń shańyraǵynyń otyn óshirmeı otyrǵan apaıymyzdyń aıtýy boıynsha, bul án 1989 jyly jaryqqa shyǵypty. 1988 jyly Jezqazǵan oblysy, Jezdi aýdanynyń Sátpaev aýylyna Beket aǵa qyzmet babymen baryp, sol jaqqa qonys aýdarady. Aǵa ózi ańshylyqty, mal sharýashylyǵymen aınalysqandy jaqsy kóredi eken. Osy oıynda iske asyrsam degen maqsat bolady. Ákimshilik tarapynan aıtqan oıyńyzdyń barlyǵy oryndalady degen ýádesin de alady. Biraq usynystyń arty sıyrquıymshaqtanyp, uzaqqa sozylady, ýáde etilgen ne baspana joq, ne jaı joq, ábden ábigerge túsedi. Kirmegen esigi qalmaıdy. Dos izdep alasuryp, jany qınalyp júrgende, bir jyl óte shyǵady. Sóıtip, shamyrqanyp, qatty ashynǵannan ánniń sózi men áýeni bir sátte shyǵyp, án bolyp tógiledi. Bul 1989 jyly jaryqqa shyqqan án eken.
-Bir baıqalatyny, sizdiń repertýaryńyz kileń osyndaı ádemi áýezben óriletin sulý ánderden quralǵan. Bulardyń