Astanada tennısten erler jáne áıelder arasynda Qazaqstan Respýblıkasy Prezıdentiniń kýbogy jolyndaǵy týrnır aıaqtaldy.
Bul básekede bizdiń sportshylarymyzdyń ishinen tek Mıhaıl Kýkýshkın ǵana fınalǵa shyǵyp, bas júlde úshin ızraıldik Dýdı Selamen kúsh synasty. Basqalary týrnır kezinde birinen soń biri utylyp qaldy. Al Kýkýshkın aqtyq synda jaraqatyna qaramaı, laıyqty deńgeıde óner kórsetti. Ol birinshi sette qarsylasyn 7:5 esebimen jeńip, kelesi sette 2:6 esebimen utylýǵa májbúr boldy. Kezdesýdiń úshinshi seti Kýkýshkın úshin óte aýyr tıdi. Ol burynnan beri ózin mazalap júrgen arqadaǵy jaraqatyn kórsetý úshin dárigerdiń kómegine júgindi. Medısınalyq kómek bergennen keıin Kýkýshkın qaıta kúsh jınap, ózine kelgenimen, kezdesýdiń sońyna qaraı tizgindi qoldan shyǵaryp aldy. Sóıtip, esep 7:6 bolyp Selanyń paıdasyna sheshildi.
Áıelder jarysynda ýkraınalyq Nadıa Kıcheno portýgalııalyq Marııa Joao Kohlerdi eki sette 6:4 jáne 7:5 esebimen utyp, jeńimpaz atandy. Juptasyp kezdesýde erler arasynda ıtalıandar Rıkkardo Gedın men Klaýdıo Grassı bizdiń Mıhaıl Kýkýshkın men Andreı Golýbevten 6:3, 3:6, 10:8 esebimen basym tústi. Áıelder arasynda apaly-sińlili ýkraınalyqtar Nadıa jáne Lıýdmıla Kıchenolar reseılik dýet Nına Bratchıkova men Valerııa Solovevany eki sette 6:2,6:2 esebimen utty.