Fýtboldan Qazaqstan Premer-lıgasynyń birinshi kezeńiniń aıaqtalýyna bir týr qalǵanda júldege talasatyn úzdik alty klýb pen aýtsaıder alty komanda anyqtaldy.
Ol jeksenbi kúni ótken týrdyń nátıjesimen belgili boldy. Endi Premer-lıganyń ekinshi kezeńinde «Aqtóbe», «Astana», «Shahter», «Ertis», «Ordabasy» jáne «Qaırat» júldeli oryndarǵa talassa, «Tobyl», «Atyraý», «Jetisý», «Vostok», «Taraz» jáne «Aqjaıyq» kelesi maýsymda Premer-lıgadaǵy óz ornyn saqtap qalý úshin kúsh synasatyn bolady.
Sońǵy týrda Almatynyń «Qaıraty» óz alańynda Pavlodardyń «Ertis» komandasyn 3:2 esebimen utyp, 30 upaımen úzdik altylyqtyń qataryna qosylsa, óz alańynda Taldyqorǵannyń «Jetisý» klýbyn 3:1 esebimen jeńgen Qostanaıdyń «Tobyly» 27 upaımen jetinshi orynda qalyp qoıdy.
Týrdyń basqa oıyndary mynadaı eseppen aıaqtaldy: «Taraz» – «Astana» 0:0, «Atyraý» – «Aqjaıyq» (Oral) 1:0, «Vostok» (О́skemen) – «Shahter» (Qaraǵandy) 0:0, «Ordabasy» (Shymkent) – «Aqtóbe» 0:1.
Osy týrda «Tobyldyń» shabýylshysy Nurbol Jumasqalıev (sýrette oń jaqta) «Jetisýdyń» qaqpasyna oıynnyń 88-mınýtynda Qazaqstan chempıonatyndaǵy 148 golyn soǵyp, el birinshiliginiń tarıhyndaǵy úzdik surmergen atandy. Sóıtip, Oleg Lıtvınenkonyń rekordyn jańartty.