Oblystyq energetıka jáne turǵyn úı sharýashylyǵy basqarmasynyń basshysy Saıyn Kámenovtiń aıtýynsha, bul kúnderi oblystaǵy qalalar men aýdandardyń qysqy maýsymǵa daıyndyǵy bekitilgen kestege sáıkes júrgizilýde. Jylý energetıka jáne turǵyn úı-kommýnaldyq sharýashylyq nysandaryn aldaǵy kúz-qys maýsymyna daıyndyqqa saı óńirdegi elektr stansalary kúrdeli jóndeýlerden ótipti. Iаǵnı, elektrmen qamtý jelileriniń 2462,8 shaqyrymyna jáne 745 qosalqy stansaǵa, 29 qazandyqqa, jylýmen qamtý jelileriniń 25,4 shaqyrymyna, sýmen qamtý jelileriniń 62,1 shaqyrymyna kúrdeli jóndeýler júrgizilip, 2399 turǵyn úıde qysqa daıyndyq jumystary jalǵasýda. Qazirgi kúnderi mektepterdiń – 77, densaýlyq saqtaý nysandarynyń – 86, áleýmettik, mádenıet jáne turmystyq nysandardyń 71 paıyzy daıyn.
Sonymen qatar, oblys ákimi Erlan Aryn oblystaǵy barlyq mektepter 1 qyrkúıekke deıin jylý berý maýsymyna daıyn bolsyn degen arnaıy tapsyrma berdi. Bárinen buryn ókinishtisi sol, keıbir turǵyndar jylý men jaryqtyń qaıdan kelip, qaıdan shyǵyp jatqanyn bilmeı tegin dúnıedeı kóretinin kommýnaldyq qyzmetterge tólenbegen qaryzdar tiziminen kóremiz. Osy jyldyń 1 maýsymyndaǵy jaǵdaı boıynsha oblys turǵyndarynyń qaryzy 457,9 mıllıon teńgeni qurap otyr. Tutynýshylar jylýmen qamtýǵa 331,9 mıllıon teńge, elektrmen qamtýǵa 90,0 mıllıon teńge, sýmen qamtý qyzmetterine 36,0 mıllıon teńge tólemegen. Budan buryndary da qalalar men aýdandardyń ákimderine merziminen keshiktirilgen qaryzdardy jabý jáne ony boldyrmaý boıynsha tıisti is-sharalar ázirleý jóninde tapsyrmalar berilgen-di. Biz bul jaıynda «Qaryz ben paryz» atty maqalamyzda jazyp ketkenbiz. Sóıtken qaryz áli kúnge deıin jınalǵan ústine jınalyp, kóbeıip barady.
Erlan Aryn qalalar men aýdandardyń ákimderine, memlekettik organdar basshylaryna qaryz máselesin baqylaýǵa alyp, 1 qyrkúıekke deıin kórsetilgen kommýnaldyq qyzmetter qaryzyn jabý boıynsha qatań sharalar júrgizýdi, sondaı-aq, shalǵaıdaǵy jáne qala irgesindegi aýyldardyń elektr, sý, jylýmen qamtý nysandaryn nazarǵa alýdy tapsyrdy. Aıtpaqshy, aýyldar demekshi, oblys ortalyǵyna qarasty Temirjolshylar kenti qazir qurylys alańyna aınalǵan, óz aǵaıyndarymyz aýyldardan kelip, turǵyn úılerdi kóptep salyp jatyr. Biraq, elektr jaryǵynyń joqtyǵy úlken máselege aınalyp otyr. О́tken jyly baǵanalar ornatylypty. Kentke elektr jaryǵyn tartýmen jumys jasap jatqan «Kabıstroıservıs» JShS merdiger uıymy osy jyldyń sońyna deıin jaryq jaǵyp beremiz dep ýáde beripti. Turǵyndardyń aıtýynsha, qazir jarqyraǵan jaz aıynda symdaryn tartyp, elektr jaryǵyn jaqpasa, byltyrǵydaı taǵy da qarańǵy úıde qalar túrleri bar. Bireýler jaryqty sýtegin paıdalansa, aýyl turǵyndary jaryqqa zárý...
Farıda BYQAI,
«Egemen Qazaqstan».
Pavlodar oblysy.