Biliktilik talaptaryna saı bolýlary mindetti

Barlyq qajetti qujaty bar zańdy qyzmetti júzege asyratynyna kóz jetkiz­gen­nen keıin klınıkaǵa júginýge keńes beremiz. Siz menshik nysanyna, vedomstvo­lyq baǵynystylyǵyna qaramastan qan­daı da bir dárigerge júginbes buryn qyzmettiń osy túrine lısenzııa­nyń jáne dárigerdiń (orta medısınalyq per­sonaldyń) ser­tıfıkatynyń bar-joǵyn surańyz.

Medısınalyq qyzmetti densaýlyq saqtaý uıymdary menshik nysa­nyna qaramastan, tıisti lısenzııasy (lı­sen­zııaǵa qosymshasy) bolǵan jaǵdaı­da zańdy negizderde kórsetýleri tıis. Den­saýlyq saqtaý uıymdarynda lısen­zııa­nyń bolýy uıymnyń densaýlyq saqtaý salasyndaǵy normalarǵa, onyń ishinde sanıtarlyq talaptarǵa sáıkestigin kýálan­dyrady.

Medısınalyq qyzmet kishi túrler (ambýlatorlyq/stasıonarlyq/stasıo­nar­dy almastyratyn, dıagnostıka), jas toptary (eresekter/balalar) jáne mamandyqtar (hırýrgııa, stomatologııa jáne t.b.) bólinisinde lısenzııalanady.

Densaýlyq saqtaý jáne áleýmettik damý mınıstriniń 2015 jylǵy 23 qańtardaǵy №27 buıryǵymen medısınalyq qyzmettiń lısenzııalanatyn túrlerine biliktilik talaptary bekitildi. Barlyq densaýlyq saqtaý sýbektileri biliktilik talaptarǵa saı bolýy tıis.

Pasıentter úshin klınıkany tańdaý krıterııleriniń biri densaýlyq saqtaý salasyndaǵy qoldanystaǵy lısenzııanyń jáne basqa da ruqsat qujattarynyń bolýy, mysaly, emdeýshi dárigerdiń nemese meıirbıkeniń sertıfıkaty bolýy tıis. Pasıent klınıkanyń densaýlyq saqtaý salasyndaǵy zańnama normalaryna sáıkes ekendigine kóz jetkizip, sapaly emdelýge sene alady. Zańnamanyń barlyq talaptaryn adal oryndaıtyn uıym – sapaly medısınalyq qyzmetterdi alýdyń kepili.

Sonymen birge lısenzııamen qatar, medısınalyq qyzmetkerlerdiń 5 jyl merzimge beriletin maman ser­tıfı­katynyń bolýy qajet. Medısınalyq qyzmetkerler, ıaǵnı dárigerler de, orta medısınalyq qyzmetkerler de ár bes jyl saıyn óz biliktilikterin arttyryp, medısınadaǵy jańa tehnologııa­lardy meńgerýleri tıis. Al lısenzııa­laý men sertıfıkattaý normalary buzylǵan jaǵdaıda zańnamada ákimshilik yqpal etý jáne tıisinshe aıyppul jáne lısenzııanyń qoldanylýyn toqtatý túrinde óndirip alý sharalary kózdelgen. Zańsyz medısınalyq qyzmet úshin dárigermen qatar uıym basshysy jaýapty bolady.