Dúnıejúzilik densaýlyq saqtaý uıymy (WHO) Qytaıdan bastalǵan jańa koronavırýsqa baılanysty jahandyq tótenshe jaǵdaı jarııalady. Indettiń basqa elderge taralýyna baılanysty Halyqaralyq medısınalyq-sanıtarlyq erejelerdiń Tótenshe jaǵdaılar komıtetiniń ekinshi otyrysy keshe Jenevada ótti.
Uıym basshysy Tedros Adhan Gebreıesýstyń aıtýynsha, bul sheshimniń basty sebebi - vırýstyń Qytaıdy jaýlaýy emes, álemniń ózge elderinde de taralýy.
Sońǵy málimetterge sáıkes, Qytaıda vırýstan 213 adam qaza tapqan, al indetti juqtyrǵandar sany 10 myńǵa jetken. Dúnıejúzilik densaýlyq saqtaý uıymy jańa koronavırýsty álemniń 18 elinde 98 adamnyń juqtyrǵanyn aıtyp otyr. Olardyń kóbisi Qytaıdyń vırýs bastalǵan Ýhan qalasynda bolǵany belgili.
Degenmen, Germanııa, Japonııa, Vetnam jáne Qurama Shtattarda koronavırýsty adamnan adamǵa juqtyrýdyń segiz jaǵdaıy tirkelgen.
Dúnıejúzilik densaýlyq saqtaý uıymynyń basshysy Qytaı bıligi qabyldaǵan tótenshe sharalardy joǵary baǵalap, Qytaıǵa saýda nemese sapardy shekteýge eshqandaı sebep joq ekenin málimdedi.
Alaıda birqatar memleketter Qytaımen shekarany jaýyp, onda qatynaıtyn ushaqtar men kólikterdi ýaqytsha toqtatyp qoıdy. Qazaqstan úkimeti de Qytaıǵa elimizden avtobýs, poıyz nemese ushaqtardyń qatynamaıtynyn jarııalady, sondaı-aq Qytaı azamattaryna ýaqytsha vıza berilmeıtin boldy.
Oǵan qosa, Google, Ikea, Starbucks jáne Tesla sekildi kompanııalar Qytaı qalalarynda ornalasqan dúkenderin jabý týraly sheshim shyǵarǵan.
Dúnıejúzilik densaýlyq saqtaý uıymyn bul jaǵdaıda tómen jáne ortasha tabys deńgeıi bar kóptegen elderdiń vırýsty anyqtaýǵa jáne emdeýge qajetti quraldarynyń bolmaýy alańdatady.
2014 jylǵy adamzat tarıhyndaǵy eń iri indet - ebolanyń Batys Afrıkada órshýi kedeı elderdiń mundaı qaýipke qarsy tura almaıtynyn kórsetken edi.
Uıym vırýsqa qarsy sharalardy jalǵastyra beretinin málimdedi jáne ózge elderdiń vırýsty anyqtaǵan jaǵdaıda barlyq málimetti Dúnıejúzilik densaýlyq saqtaý uıymymen bólisýge mindetti ekenin eskertti.