«Saqaldy qurylysqa» aınala jazdaǵan qurylys jaıly áńgimeniń núktesi ádemi qoıyldy.
Bizge jetken aqparatqa sáıkes, kelisimge 12 aqpanda Eýrazııalyq damý banki Basqarma Tóraǵasynyń orynbasary Amangeldi Isenov qol qoıǵan. «Jobany Eýropalyq qaıta qurý jáne damý banki, Eýrazııalyq damý banki jáne Islam damý banki usynatyn kredıtorlar sındıkaty qarjylandyrady. Joba aıasynda EADB 95 mıllıon dollar beredi», delingen EADB baspasóz bólimi taratqan aqparatta.
Joba Indýstrııa jáne ınfraqurylymdy damytý mınıstrligi men tórt kompanııanyń konsorsıýmy arasynda jasalǵan konsessııalyq kelisim negizinde júzege asyrylady: Alsim Alarko Sanayi Tesisleri ve Ticaret A.Ş., Makyol İnşaat Sanayi Turizm ve Ticaret A.Ş., SK Engineering & Construction Co., Ltd. jáne Korea Expressway korporasııasy.
Kelisim «qurylys - berý - paıdalaný» sharttarymen 20 jylǵa jasaldy.
Indýstrııa jáne ınfraqurylymdy damytý mınıstrliginiń málimetinshe, jobanyń quny 150 mıllıard teńgeni quraıdy.
Joldyń uzyndyǵy alty jolaqty qozǵalyspen 66 shaqyrym.
38 kópir ótkelin jáne jol ótpelerin, sonymen qatar joldyń jáne onyń qurylymdarynyń joǵary sapasyn qamtamasyz etý úshin aldyńǵy qatarly tehnologııalardy qoldaný arqyly salynatyn jeti kóliktik ótkeldi qamtıdy. Joba daıyn obektini memleket menshigine qabyldaǵannan keıin ǵana ınvestorlardyń shyǵyndaryn respýblıkalyq bıýdjetke aýyrtpalyqsyz birtindep óteýdi kózdeıdi.
2018-2019 jyldary jobalyq-smetalyq qujattamany ázirleý jáne basqa da daıyndyq jumystary júrgizildi. Búgingi tańda Almaty 26,5 km jolda qurylys-montaj jumystaryn júrip jatyr.
Jol aqyly bolady. Jeńil avtomobılder men júk kólikterine ártúrli tarıfter bolady. Aldyn ala zertteýler boıynsha 15 jyl ishinde 231, 25 jyl ishinde 570 mlrd teńge jınalady.
Esterińizge sala keteıik, budan buryn Elbasy Nursultan Nazarbaev Úlken Almaty aınalma jolynyń qurylysyn bastaýǵa tapsyrma bergen bolatyn. Buǵan deıin burynǵy ınvestısııalar jáne damý mınıstri Jeńis Qasymbek qurylystyń uzaq ýaqytqa keshiktirilý sebebin, Almaty qalasynyń eks-ákimi Baýyrjan Baıbek óz kezeginde qurylysqa 1,5 mıllıard dollardan astam qarajat ketetinin aıtqan bolatyn.
Atap ótsek, «Úlken Almaty aınalma avtokólik joly» jobasy uzyndyǵy 66 shaqyrymdyq avtojolyn salý men iske qosýǵa baǵyttalǵan.
Jabyndysy sement-betondy avtokólik joly 4 jáne 6 jolaqty bolmaq. Jobanyń quramyna kólik jol aıyryǵy, kópirler, estakadalar, jol kórsetkishteri jáne basqalary engizilgen.