Ústimizdegi jylǵy 3-4 sáýirde Nıameı qalasynda (Nıger Respýblıkasy) «Beıbitshilik pen damý jolynda birlesken kúsh-jigermen terrorızmge qarsy kúres» taqyrybynda ótetin Islam yntymaqtastyǵy uıymynyń Syrtqy ister mınıstrleri keńesiniń 47-shi sessııasyna daıyndyq aıasynda qazaqstandyq delegasııa ú.j. 4-11 aqpan aralyǵynda IYU Bas hatshylyǵynyń Jıdda qalasyndaǵy shtab-páterinde uıymdastyrylǵan IYU Ekonomıkalyq, mádenı jáne áleýmettik máseleler jónindegi ıslam komıssııasynyń (ISECS) 43-shi sessııasyna jáne Aǵa laýazymdy tulǵalar (SOM) otyrysyna qatysty. Bul týraly Syrtqy ister mınıstrliginiń baspasóz qyzmeti habarlady.
Elimizdiń delegasııasyn Qazaqstannyń Saýd Arabııasyndaǵy Elshisi, IYU janyndaǵy Turaqty ókili Berik Aryn basqaryp, onyń quramyna QR SIM Taıaý, Orta Shyǵys jáne Afrıka departamentiniń dırektory Erjan Muqash jáne Jıdda qalasyndaǵy QR Bas konsýly Talǵat Shaldanbaı kirdi.
Is-sharalar barysynda saıası, ekonomıkalyq, áleýmettik jáne mádenı máseleler, sondaı-aq ǵylym jáne tehnologııalar, densaýlyq saqtaý salalaryndaǵy yntymaqtastyq, sý resýrstary, klımat pen qorshaǵan ortanyń ózgerýi, otbasy máseleleri qarastyryldy.
Otyrystardyń qorytyndysy boıynsha elimizdiń syrtqy saıası bastamalaryn odan ári ilgeriletýge qatysty birqatar qararlardyń jobalary qoldaý tapty. Olardyń ishinde, «Islamdyq tatýlasý», Azyq-túlik qaýipsizdigi jónindegi ıslam uıymy (AQIU) men «Astana» halyqaralyq qarjy ortalyǵynyń qyzmetterine, Álemdik jáne dástúrli dinder lıderleriniń sezine, Ǵylym jáne tehnologııalar men t.b. salalardaǵy jetekshi musylman memleketteriniń qatysýymen IYU-15 dıalog alańyn qurýǵa qatysty qararlardyń jobalary bar.
Uıymǵa múshe memleketter Qazaqstannyń IYU aıasynda Ábý Nasyr Ál-Farabıdiń 1150-jyldyǵyn keńinen atap ótý jónindegi usynysyn biraýyzdan quptady.
Atalǵan is-sharalar aıasynda qazaqstandyq delegasııa birqatar ekijaqty kezdesýler ótkizdi. Atap aıtqanda, Dakka qalasyndaǵy Islam tehnologııalyq ýnıversıtetiniń prorektory Omar Djahpen bolǵan kelissózderdiń nátıjesinde atalǵan ýnıversıtet alańynda Ábý Nasr Ál-Farabıdiń ómiri men qyzmetine arnalǵan ǵylymı-tájirıbelik konferensııa ótkizý týraly ýaǵdalastyqqa qol jetkizildi.
Túrkııanyń IYU janyndaǵy Turaqty ókili Saleh Mýtlý Shenmen AQIU Bas dırektory E.Baıdaýletpen birlese ótkizgen kezdesý barysynda túrik tarapy 2020 jyly AQIU Bas Assambleıasynyń 3-shi otyrysyn Túrkııada ótkizýge daıyndyǵyn bildirdi.