19 aqpan kúni elorda turǵyndary men qonaqtarynyń nazaryna Dj.Verdıdiń ǵalamat «Don Karlos» operasy usynylady. Alǵash ret patshaıym Elızaveta Valýanyń basty partııasynda «Astana Opera» Úlken zaly sahnasyna teatrdyń áıgili jetekshi solısi Qazaqstannyń eńbek sińirgen ártisi, Memlekettik syılyqtyń laýreaty Maıra Muhamedqyzy shyǵady. Bul týraly «Astana Opera» teatrynyń baspasóz qyzmeti habarlady.
– Elızaveta partııasynda vokal da, akterlik sheberlik te kúrdeli. Patshaıym bolǵan qandaı? Iаǵnı, bul symbattylyqty, qımyl-qozǵalystyń aıryqsha ıkemdiligin, kerbezdigin qajet etedi. Elızaveta jas, aqyldy, óktem jan, kórermen meniń patshaıym ekenime senetindeı etip beıneni jasaýym kerek. Osy partııaǵa deıin meniń repertýarymda tek ǵashyq nemese qaza bolatyn qyzdar ǵana boldy. Qazir óz beınemdi izdeýdemin. Ol ne týraly oılaıtynyn, onyń qandaı sezimde bolǵanyn túsingim keledi. Elızaveta – azap shegýshi áıel – Don Karlosty jan-tánimen súıedi, biraq patshanyń aldynda óziniń adaldyǵyn, ar-namysyn saqtaıdy. Daıyndyq jasap júrip, men olardyń ómiri qandaı qıyn bolǵan dep oılanamyn. Mysaly, búkil álem Fılıpp patshanyń aıaǵynyń astynda, biraq ony eshkim jaqsy kórmegendikten, ol azap shegedi. Osyndaı sátterde men ózimdi baqytty opera ánshisi sanaımyn. Sebebi ártúrli keıipkerlerdiń taǵdyryn bastan ótkizip, qaıta ózimniń qalpyma kele alamyn, – dedi Maıra Muhamedqyzy.
Bas partııalarda «Astana Operanyń» jetekshi solısteri óner kórsetedi: Fılıpp II – Armenııanyń Halyq ártisi Barseg Týmanıan, Don Karlos – Qazaqstannyń eńbek sińirgen qaıratkeri, Italııa Juldyzy Ordeniniń kavaleri Medet Chotabaev, Rodrıgo – Qazaqstannyń eńbek sińirgen qaıratkeri Talǵat Musabaev jáne teatr solısteri: Uly ınkvızıtor – Bolat Esimhanov, Hanshaıym Ebolı – Tatıana Vısınskaıa, Monah – Shyńǵys Rasylhan, Tebaldo – Mádına Islamova, Aspan daýysy – Elena Ganja, Graf dı Lerma – Erulan Kámel, Gerold – Ramzat Balakıshıev.
«Astana Opera» sımfonııalyq orkestri, hory, baleti, mımans ártisteri, mýzykalyq jetekshi – teatrdyń bas dırıjeri, Qazaqstannyń eńbek sińirgen qaıratkeri, Memlekettik syılyqtyń laýreaty Alan Bóribaev. Qoıýshy rejısser, ssenograf – opera áleminiń eń bedeldi Opera Star Award 2019 marapatynyń ıegeri Davıde Lıvermor. Ssenografııa – Gio Forma stýdııasy, kostıýmder boıynsha sýretshiler – Qazaqstannyń eńbek sińirgen qaıratkerleri Sofıa Tasmaǵambetova, Pavel Dragýnov, bas hormeıster – Qazaqstannyń eńbek sińirgen qaıratkeri Erjan Dáýitov.
Frıdrıh Shıllerdiń attas dramasy boıynsha lıbrettosyn Jozef Merı men Kamıl dıý Lokl jazǵan. Álemdik premerasy 1867 jyly 11 naýryzda Parıjde oryn alǵan, al «Astana Operadaǵy» qoıylym premerasy jetinshi teatr maýsymy aıasynda 2019 jyldyń qazan aıynda orasan zor tabyspen ótti.