Aqpan aıynyń alǵashqy onkúndiginde Kaspıı teńiziniń jaǵalaýyna qoqıqazdar ushyp keledi. Bıyl da myńdaǵan qoqıqaz jyly aımaqtardan Kaspııge oraldy. Bul týraly Ekologııa, geologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet Facebook paraqshasynda jazdy.
- Qoqıqazdar myńdaǵan shaqyrymdardaǵy alys aımaqtarda qystaıdy. Olar Qazaqstannyń birneshe óńirinde ǵana, atap aıtqanda Kaspıı teńiziniń soltústik-shyǵysynda, Shalqarteńiz kóliniń mańynda, Teńiz kólinde uıalaıdy. El aýmaǵynda shamamen 50-100 myńǵa tarta qoqıqaz jazdy ótkizedi. Olar kóbinese Teńiz kóliniń mańynda shoǵyrlanǵan. Al qalǵan bóligi Kaspıı teńizi men Shalqarteńizdi mekendeıdi. Kaspıı teńizine júrgizilgen taldaý jumystary Lenkoran jaǵalaýynda - 10 myń, Túrikmen jaǵalaýynda - taǵy 10 myń qoqıqazdyń qystaıtynyn kórsetken, - dep jazdy Sáken Dildahmet.