Qytaı eliniń shekarasymen shektesetin Shyǵys Qazaqstan oblysynda sol elden shyqqan koronavırýstyń taralýyna jol bermeý maqsatynda tıisti jumystar qolǵa alynǵan.
Oblystyq Taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń bergen málimetterine súıensek, óńirdegi Maıqapshaǵaı, Baqty keden beketteri baqylaýǵa alynyp, koronavırýs ınfeksııasynyń aldyn alatyn barlyq qajetti dezınfeksııalyq qural-jabdyqtarmen qamtamasyz etilipti. «Teplovızorlar men ızolıator bólmesi bar. Departamenttiń medısına qyzmetkerleri men mamandary Qytaı men ózge elderden kelgen adamdarǵa medısınalyq baqylaý júrgizip otyrady. Olardyń barlyǵyna monıtorıng jasalady. Eshqandaı vırýstyq ınfeksııa belgileri anyqtalǵan joq. Oblysta 100-ge jýyq Qytaı azamattary jumys isteıdi. Olardyń barlyǵy tıisti mekemelerdiń qadaǵalaýynda» deıdi atalǵan departamenttiń baspasóz hatshysy Baǵlan Taýanova.
Koronavırýstyń aldyn alý maqsatynda oblysta jedel shtab qurylǵany belgili. Shtab usynǵan málimetterge súıensek, óńirge kelip jatqan adamdardyń barlyǵy medısınalyq uıymdardyń baqylaýyna alynǵan. «Búginde oblysqa kelýshi adamdardyń sany 8733 adamdy quraıdy. Onyń 8660-y – Qazaqstan azamattary, 73-i – shetel azamattary. Qazirgi tańda aımaqtaǵy ınfeksııalyq tósekter sany – 500. Qosymsha 523 oryn ázir. Vırýsqa qarsy preparattar qory jetkilikti. Medısınalyq uıymdarǵa 1 tıpti qorǵanysh kostıýmderiniń 13932 danasy jetkizilgen. Qosymsha 7371 danaǵa ótinish berilgen», deıdi shtab ókilderi.
О́SKEMEN