Almaty oblysynda sońǵy 5 jyl aralyǵynda 75 mektep jańadan salynyp, paıdalanýǵa berilgen eken. Alaıda, óńirde áli de mektep ǵımaratynyń jetispeýshiligi ótkir kúıinde qalyp otyr. Qazir 38 mektepte oqýshylar úshaýysymda bilim alýǵa májbúr.
-Biz bul máseleni sheshýge barynsha kúsh salyp kelemiz. Biraq, aımaqtaǵy demografııalyq ósim men ishki mıgrasııanyń esebinen jyl saıyn mektep tabaldyryǵyn attaıtyn bala sany qaýlap ósip jatyr. Mysaly, 2019-2020 oqý jylynda 48 myń búldirshin birinshi synypqa barǵan. Iаǵnı, bilim alýǵa qajetti oryn sany birden 20 myńǵa kóterildi. Ntáıjesinde, mektepter úshaýsymda oqytýǵa eriksiz kóshti, dedi búgin halyq aldynda esep bergen oblys ákimi Amandyq Batalov.
Bıyl óńirde taǵy 13 mektep ǵımaratynyń qurylysy aıaqtalyp, qoldanysqa engizilmekshi. Buǵan 11,2 mıllıard teńge jumsalmaq. Onyń ishinde 8 mektep osy úshaýysymda bilim berý máselesin sheshý úshin salynýda. Buıyrsa, Jambyl, Ile, Qarasaı aýdandarynyń birneshe aýylynda turatyn oqýshylar jańa oqý jylynan bastap keń synypta bilim almaqshy. Sondaı-aq, Eńbekshiqazaq aýdany men Qarasaı aýdany aýmaǵynan taǵy 6 mekteptiń irgetasy quıylmaqshy. Osy maqsatqa 10,3 mıllıard teńge qarjy qarastyrylypty.
Jalpy, oblysta jeke ınvestorlardyń qarajatyna mektep salý isi jolǵa qoıylyp otyr eken. Qaltaly azamattar bilim oshaqtaryn salýǵa yntaly. Qazirdiń ózinde memleket pen jekemenshik áriptestigi arqasynda boı kótergen birneshe ǵımarat bar. Qaratal aýdanynda bastaýysh mektep pen Qarasaı aýdanynyń Áıteı aýylyndaǵy 1200 orynǵa yńǵaılanǵan orta mektep sonyń dáleli.
Aıtpaqshy, aımaqtaǵy úshaýysymdy mektepterdiń jaǵdaıy jalpy bilim berý baǵytyndaǵy jalǵyz másele emes. Sonyń biri oqýshylardy tasymaldaý jaıy. Qazir oblys aýmaǵynda 15 700 bala mektepke qatynap oqıdy eken. Olar negizinen shaǵyn eldi mekender men saıajaılar aýmaǵynda turatyn otbasylardyń balalary. Osy tasymaldap oqytý jaıy syn kótermeıdi. Qatynaý kezinde balanyń qaýipsizdigine qater tóngen oqıǵalar jıi bolyp turady. Mektep tarapynan bólingen kólikterdiń tehnıkalyq jaǵdaıy tómen. Júrgeninen turǵany kóp avtobýstardyń kesirinen balalar mektepke jaıaý nemese kezdeısoq kólikpen barýǵa májbúr.
-Balalardy tasymaldaý boıynsha týyndaǵan máselege janymyz aýyrady. Bul máseleni túbegeıli sheshsek deımiz. Bıyl muqtaj mektepterge 70 jańa avtobýs satyp alyp berýdi uıǵardyq. Qazir osy maqsatqa dep 1 mıllıard teńge bóldik, ol qarjyǵa barlyq mektep qajetti kólikpen 100 paıyzǵa qamtylady, dedi Almaty oblysynyń ákimi Amandyq Batalov.