Almaty oblysynyń jekelegen aýdandarynda «Jedel járdem» qyzmetiniń bir brıgadasy 10 000 turǵynǵa qyzmet kórsetýge májbúr bolyp otyr. Sondaı-aq alǵashqy medısınalyq kómek kórsetýge asyqqan dárigerlerge minetin kólik te jetispeıdi eken.
Oblys ákimi Amandyq Batalov turǵyndarmen kezdesý barysynda mundaı máseleniń baryn moıyndady. Qazir aımaqtaǵy «Jedel járdem» qyzmetiniń ókilderine óz mindetterin múltiksiz atqarý úshin 70 kólik qajet. Jáne alǵashqy medısınalyq kómektiń tıimdiligin arttyrý úshin kólikpen qatar kerek-jaraǵy saı bilikti mamandardyń da qatary kóbeıýi tıis.
-Aýdan ákimderiniń esep berýi kezinde eń kóp shaǵym aıtylǵan máseleniń biri «Jedel járdem» qyzmetine qatysty boldy. Bul jaǵdaı halyq kóp shoǵyrlanǵan aýdandarǵa qıyn tıip turǵany ras. Bizdiń esebimiz boıynsha, bir brıgadaǵa 10 myń adamnan keledi eken. Iаǵnı, «Jedel járdem» brıgadalarynyń sanyn kóbeıtip, qyzmettiń sapasyn jaqsartýǵa kúsh salamyz. Birinshi kezekte kólik tapshylyǵyn sheshemiz. Qazir respýblıkalyq bıýdjet esebinen 35 kólik satyp alýǵa qarjy bólindi. Qalǵan 35 kólikti oblystyń qarajatyna alyp jatyrmyz, - dedi aımaq basshysy.
Jalpy, oblystyń densaýlyq saqtaý salasynda kadr tapshylyǵy qatty sezilip otyr. Oblys ákiminiń esebinde aıtylǵandaı, aımaqta 214 mamanǵa suranys bar eken. Onyń ishinde 126 jalpy tájirıbe dárigeri jetispeıdi. Oblys tarapynan kadr tapshylyǵyn sheshý úshin dáriger daıyndaıtyn joǵarǵy oqý oryndarymen tyǵyz baılanys jasalyp jatyr. Qajetti mamandy oqytý úshin oblystyq bıýdjetten 18 mıllıon teńge qarjy qaralypty. Bıyldan bastap 47 jas dáriger joǵarǵy medısınalyq bilim beretin oqý oryndaryn támamdap, oblystyń aýdandarynda jumysqa kirispekshi.
-Medısına salasyndaǵy maman tapshylyǵynyń bir ushy jas dárigerlerdi baspanamen qamtýǵa tireledi. Ásirese, aýdan ortalyqtary men aýlydarǵa barǵan jas mamannyń turaqtap qalýyna jaǵdaı jasaýymyz kerek. Bıyl birinshi kezekte jalpy tájirıbe dárigerilerin turǵyn úımen qamtýǵa kirisemiz. Olarǵa arnap barlyq aýdan men qaladan 126 páter satyp alýdy bastady. Bul maqsatqa 756 mıllıon teńge bóldik, - dedi óz sózinde Amandyq Batalov.
Almaty oblysy