«Qazaqstan» telearnasyndaǵy «Ashyq alań» baǵdarlamasynda tikeleı efırde Májiliste qarastyrylyp jatqan Densaýlyq kodeksiniń jańa jobasy talqylandy.
Tikeleı efırde qoǵam qaıratkeri Murat Ábenov halyq transplantolog dárigerlerge senbeıtinin aıtty.
«Jaqynda eki transplantolog dáriger shetel azamattaryna organ satyp, ustalyp jatyr. Bıznes jasaǵan. Biz 3 myń adam kezekte tur deımiz, al aǵza shetelge ketip jatyr. О́kinishke qaraı, halyq transplantolog dárigerlerge senbeıdi», - dedi Murat Ábenov.
Onyń aıtýynsha, jaqynda qoǵamda shý shyǵarǵan Aqtóbedegi jas jigittiń aǵzasyn donorlyqqa alý jaǵdaıynda jigittiń mıy ólgen.
«Medısına mamandary adamnyń júregi soǵyp tursa da, mıy ólse ony qalpyna keltirý múmkin emes deıdi. Osylaısha aǵzany donorlyqqa suraıdy. Al 2014 jyly Múftııattyń pátýási boıynsha júregi soǵyp turǵan adamnyń aǵzasyn donorlyqqa alýǵa bolmaıdy», - deıdi Murat Ábenov.
Onyń aıtýynsha, donorlyqtyń basqa jaǵyn da qaraý kerek.
«Bireýdiń týysqany reanımasııada jatyp, onńi emin oılap otyrǵanda, dárigerler ony emdeýmen jumys joq, onyń aǵzasy kimge sáıkes keledi dep izdeýmen bolady. Kóp adamnyń qorqatyny sol ǵoı. Ony emdeýdi emes, donorlyqqa aǵzasyn alý týraly ǵana oılap ketedi. Sol jaǵyn da oılaý kerek», - dedi ol.
Al Transplanttaýdy úılestirý jónindegi respýblıkalyq ortalyǵy dırektorynyń mindetin atqarýshy Ádil Jumaǵalıevtiń aıtýynsha, mıy ólgen adamdy qalpyna keltirý múmkin emes. Sonymen qatar ol Qazaqstan TMD elderi arasynda Qazaqstandaǵy transplantologııa úshinshi orynda ekenin aıtty.