Volonter degende kóz aldymyzǵa birden kileń jastardyń kele qalatyny bar. Bul túsinikti de: boıynda kúsh-qýaty bar jastyń kári-qurtańǵa, bala-shaǵaǵa kómek qolyn sozýyn mindetti sharýa sanaımyz, zańdy dep te qabyldaımyz. Áıtse de, volonterlik degenińiz jas talǵamaıdy eken. Keýdede izgilik pen meıirimge toly úlken júrek soǵyp tursa, ol óz degenin istemeı qoımaıtyn kórinedi. Buǵan mysaldy alystan izdep keregi joq.
Qaraǵandy oblysyndaǵy Nura aýdanynyń Saryózen aýyldyq okrýginde turatyn Mınnıagzam Avlııarovty elimizdegi eriktilerdiń atasy dep senimdi túrde ataýǵa bolady. Seksenniń seńgirine shyqqan qarııa shynjyr tabandy «DT-75» traktorymen, mine, birtalaı jyl bolǵan, aýyldastarynyń muqtajyn ótep júr: qystygúni kóshelerdi qardan arshysa, kóktem shyǵa kómir sýaǵarlaryn tazartady. Munymen de tynbaı, jazda áleýmettik turǵyda áljýaz sanalatyn otbasylar men joq-jitik jandardyń shóbin shaýyp, túsirip beretin kórinedi. Osynyń bárin ol júrek qalaýymen erikti túrde jáne sý tegin isteıdi. Jurt «Eń quryǵanda jaǵarmaıyn quıyp bereıik» dese, aqsaqal renjıtin kórinedi. Jaqsynyń isine ábden tánti bolǵan jerlesteri bul kisini «Saryózendik sýpermen» dep áspettep, qurmet tutady eken.
Mınnıagzam Avlııarov bashqurt ultynyń ókili. Qazaqstanǵa tyń ıgeremin dep kelgen onyń peshenesine Saryózen aýyldyq okrýgine qarasty Tikenektini meken etip qalý jazylypty. Osy jerde zeınet jasyna jetkenge deıin mehanızator bolyp ter tókken. Adal eńbegimen aınalasyna syıly bolǵany ǵoı, ardagerdiń keýdesinde «Qurmet belgisi» ordeni men «Eren eńbegi úshin» medali jarqyraıdy. Al ótken jyly Mınnıagzam Avlııarov «Shapaǵat» medalimen marapattalǵan.
«Saryózendik sýpermenniń» baýyrynan bes bala órbigen. О́zi de, balalary da qazaqshaǵa sýdaı. Ultymyzdyń salt-dástúrine qurmetpen qarap, qazaqtyń ishine tastaı batyp, sýdaı sińip ketken. Ony aıtasyz, bul kisiniń kelinderi men kúıeý balalary túgeldeı qazaqtan eken.
О́zi úshinshi toptaǵy múgedek bolsa da, ózgelerge, onyń ishinde on eki múshesi túgel saý jastarǵa ónege tutar istiń úlgisin kórsetip júrgen qarııanyń ǵumyr jasy uzaq bolsa eken dep tileısiń!
Qaraǵandy oblysy