Uly Abaıdyń 175 jyldyq mereıtoıyna arnalǵan «Araı – 2020» baıqaýynyń irikteý kezeńine 294 úmitker qatysqan bolatyn. Al kúni keshe solardyń aqtyq synǵa joldama alǵan 38-i baq synady. Túrkistan qalasyndaǵy R.Seıtmetov atyndaǵy mýzykalyq-drama teatrynda ótken jas estrada ánshileri men mádenı is-shara júrgizýshiler baıqaýyn oblystyq mádenıet basqarmasy uıymdastyryp otyr.
Abaıdyń shyǵarmalaryn jastar arasynda keńinen nasıhattap, jas talant ıeleriniń ónerine qoldaý bildirýdi maqsat etken baıqaý 25 jyldan beri dástúrli túrde ótkizilip keledi. Bul joly qazylyq etýge halyqaralyq jáne respýblıkalyq teatr festıvalderiniń júldegeri, memlekettik «Daryn» syılyǵynyń ıegeri, Astana jastar teatrynyń akteri Ádil Ahmetov pen oblystyq «Araı» jas án oryndaýshylar baıqaýynyń 1996 jylǵy gran-prı ıegeri, halyqaralyq «Azııa daýysy» festıvaliniń jeńimpazy, ánshi Baýyrjan Isaev shaqyrylypty. Abaı ánderimen qatar halyq kompozıtorlarynyń da shyǵarmalary oryndalǵan baıqaýdyń ashylý saltanatynda oblystyq mádenıet basqarmasy basshysynyń mindetin atqarýshy Asylhan Temirhan óner dodasy sońǵy tórt jyldan beri eki jylda bir ret ótkizilip júrgenin aıtyp ótti. Oblystaǵy ımıdjdik konkýrs bolǵandyqtan, munda top jarǵandar respýblıkalyq baıqaýda baq synaıdy.
Sonymen án baıqaýynyń bas júldesine Aplaton Raqymjan laıyq dep tanylsa, «Altyn juldyz» dýeti júldeli birinshi oryndy ıelendi. Al Jaına Ápsattar ekinshi orynǵa, Ardaq Ysqaqova men Sátdáýlet Súleımenov úshinshi orynǵa laıyqty dep tanyldy. Mádenı is-shara júrgizýshiler saıysynda bas júldeni Inabat Abythanqyzy jeńip aldy, al birinshi orynǵa Nu-raıym Tólebek, ekinshi orynǵa Jasmına Anarbek laıyq dep tanyldy. Dastan Áljanov pen Nurken Abdrahman úshinshi oryndy ıelendi.
Budan bólek, oblystyq mádenıet basqarmasynyń arnaıy júldeleri de óz ıelerine tabys etildi. О́ner dodasynyń sońy gala-konsertke ulasty.
Túrkistan oblysy