Elimizdiń tuńǵysh Prezıdenti «Egemen Qazaqstan» gazetiniń búgingi nómirinde jarııalanǵan maqalasynda dúnıejúzine aýyrtpashylyq túsirgen indetti halqymyzdyń tózimdiligi, erik-jigeri jáne ózine degen zor senimi arqasynda jeńip shyǵatynymyzdy aıtty.
«Árıne, qalyptasyp otyrǵan jaǵdaı ońaı emes. Bul – búkil álem memleketterine túsken zor aýyrtpashylyq. Biz ony osyndaı syn saǵatta septigin tıgizetin halqymyzdyń tózimdiligi, erik-jigeri jáne ózine degen zor senimi arqasynda mindetti túrde jeńip shyǵamyz. Ol úshin bizge qajetti nárse – qarjy-qarajat, materıaldyq resýrs, tehnıka, azyq-túlik – bári bar. Alańdaıtyn, abyrjıtyn esh negiz joq» delingen maqalada.
Elbasy halyqty ártúrli arzan áńgimelerge erýden saq bolýǵa shaqyrdy.
«Ádette jurt kóńili alań osyndaı kezdi el ishine úreı taratyp, baıbalam salýshylar óz múddesine paıdalanýǵa tyrysady. Men halyqty ártúrli sondaı azǵyryndy, arzan áńgimelerge erýden saq bolýǵa shaqyramyn. Shynymen kóptiń qamyn kózdeıtin adam aıǵaıshyl kúshimen emes, ıgilikti isimen qyzmet etkeni durys. Ǵaıbat pen baıbalam ornyna ǵylym-bilimmen shuǵyldanǵan abzal»,- dedi N.Nazarbaev.
Elbasy maqalada Qytaıdyń indetti berik tártiptiń arqasynda jeńgenin atap ótti.
«Búgingi kúres dańqty qolbasshy Baýyrjan Momyshulynyń: «Tártipsiz – el bolmaıdy, tártipke bas ıgen el qul bolmaıdy» degen qanatty sózin eske salady jáne sony bekem ustanýdy talap etedi. О́zderińiz bilesizder, bul pandemııany kórshimiz Qytaı eli uıymshyldyǵy men temirdeı berik tártibiniń arqasynda aýyzdyqtaı aldy» dep jazdy Elbasy.