Pandemııanyń zil-batpan aýyr salmaǵy elimizdegi volonterler qozǵalysynyń ókilderine jańa, tyń sheshimderdi qabyldaýdy qajet etetini anyq. Osy oraıda olar buǵan deıin ázirlegen jobalary men is-josparlaryn tótenshe jaǵdaı talaptaryna sáıkestendirý ústinde. Osy rette Aqtóbe qalasynda volonterler qatarynan arnaıy shtab qurylyp, onyń músheleri jaýapty isterdiń bel ortasynda júrgenin aıtý paryz.
Volonterler qazirgideı kezde qamqorlyq pen kómekti qajet etetin qoǵamnyń osal toptaryna kómek kórsetýde. Sonymen birge turǵyndar arasynda indetiń aldyn alý men odan saqtanýǵa qatysty jan-jaqty túsindirý jumystaryn júrgizýde. Shtab músheleri tarapynan aqparattyq paraqshalar ázirlenip taratylýda. Volonterler óz qoldarymen tigip, turǵyndarǵa tegin berilgen medısınalyq betperdeler de olarǵa degen rızashylyq sezimin týǵyzdy. Mundaı jyly pikirdi muqtaj jandarǵa shtab músheleriniń qolymen jetkizilip berilgen azyq-túlik jıyntyǵy men gıgıenalyq quraldarǵa qatysty aıtýǵa da bolady.
Aqtóbe oblystyq jastar resýrstyq ortalyǵynyń basshysy Gúlnar Qabıevanyń aıtýynsha, volonterlerdiń qaıyrymdylyqqa toly is-qımyldary tutastaı óńir boıynsha kórinis tabýda. Oblys aýdandary arasynda onyń basty legin 19 toptan quralǵan Shalqar aýdanynyń volonterleri bastap keledi.
– Aımaqtaǵy árbir volonter tobynyń ózgeni qaıtalaı bermeıtin ózindik is-josparlary bar. Bular qoǵamdyq ómirdiń san túrli baǵyttary boıynsha qurylǵan. Áıtse de olardyń báriniń aldyna qoıǵan maqsattary ortaq. Bul qıyn jaǵdaıǵa tap bolǵan áleýmettik toptarǵa qolushyn berý, – deıdi Shalqar aýdandyq jastar resýrstyq ortalyǵynyń jetekshisi Janna Ábdenova.
Budan bólek oblys aýmaǵynda Qyzyl Aı qoǵamy oblystyq fılıalynyń volonter jastary men «Antikor» ortalyǵynyń ókilderi qaıyrymdylyq qaǵıdattaryn oıdaǵydaı oryndap júrgeni de oń pikirge ábden laıyqty. Qazirgi kezde oblys aýmaǵynda belgilengen aıryqsha rejimdegi shekteý sharalaryna baılanysty jeti blok-beket jasaqtaldy. Volonterler osy oryndarda kúndiz-túni jumys istep júrgen mamandarǵa kómek berýge de bir kisideı jumylǵan.
Bul baǵytta M.Ospanov atyndaǵy Batys Qazaqstan memlekettik medısınalyq ýnıversıtetiniń jas dáriger-rezıdentterinen qurylǵan volonterler toby naǵyz erler men qaharmandarǵa tán is-qımyl kórsetýde. Ár aýysymda 14 adamnan turatyn volonterlerdiń jumys tártibi óte tyǵyz ári óte kúrdeli. Olardyń basty mindetteri belgilengen nusqaýlyqqa sáıkes ruqsat etilgen júrgizýshiler men kásipkerlerge arnaıy qyzmet toptary múshelerine jáne tranzıttik turǵyndardy medısınalyq tekserýlerden ótkizip, qyzýyn ólsheý ári ózge de klınıkalyq ózgeristerdi baıqaý bolyp otyr.
Olardyń jınaǵan aqparattary óz kezeginde taýarlar men kórsetiletin qyzmetterdiń sapasy jáne qaýipsizdigin baqylaý departamentiniń mamandaryna joldanady. Máseleniń arǵy jaǵy bekitilgen hattama boıynsha sheshimin tabady.
Dáriger volonterlerdiń biri Rýslan Araqbaev Aqtóbe – Atyraý avtotrassasy baǵytynda qoıylǵan blok-bekette tutastaı táýlik boıy eki adamnan kezekshilikke turatynyn aıtyp berdi. Jas dáriger-rezıdent otbasyn qurǵan, sábıleri bar.
– Tutastaı elimizge qaýip-qater tóndirip otyrǵan indet kezinde osyndaı sheshim qabyldaýdy azamattyq paryzym dep eseptedim. Koronavırýs ınfeksııasy taralýyn neǵurlym tezirek tejesek, qalypty ómirge soǵurlym jaqyndaı túsemiz. Buǵan eshqandaı kúmánim joq. Osyndaı óte kúrdeli kezeńde áriptesim Arman Amantaev ekeýmiz jaı ǵana baqylaýshy bolyp qalǵymyz kelmedi, – deıdi Rýslan.
Rýslannyń oı-tujyrymyna saısaq, ózderimen birge blok-beketterde ýaqytpen sanaspaı kezekshilikte júrgen polısııa men áskerı qyzmetshiler, sanıtarlyq dárigerler men dezınfektor mamandar, atqarýshy bılik ókilderi de dál osylaı oılaıdy. «Kezekshilik kezinde bir-birimizben tez til tabysyp kettik. Aramyzda eshqandaı túsinbestik týyndaǵan emes. Árqaısymyz ózimiz atqaratyn mindetterdi tereń sezinip júrmiz dep aıtqym keledi. Aldaǵy ýaqytta da dál solaı bola beretinine senimim mol», dep túıindedi ol óz oıyn.
Elimizdiń ár azamaty óziniń áleýmettik jaýapkershiligin jas volonter dáriger-rezıdent Rýslansha sezine alsa, indetti soǵurlym tezirek jeńip shyǵatynymyz anyq.
AQTО́BE