Byltyr «Jastar jyly» aıasynda Kókshetaý topyraǵynda talantty jastardan quralǵan «EL Jastar» teatry (eksperementaldy-loborotorııalyq jastar teatry) ashylǵan bolatyn.
«Jastar jyly» aıasynda ashylǵan teatrdyń alǵashqy aıaq alysy jaıynda «Egemen Qazaqstan» gazeti arqyly taraldy. Sonyń arqasynda ózge aımaqtarda osyndaı óner ujymdarynyń bas kóterýine úlgi bola bildi. Teatr trýppasy qurylǵanyna kóp uzamaı-aq Aqtóbe qalasynyń 80 jyldyǵyna arnalǵan «Balaýsa» halyqaralyq festıvaline qatysyp keledi. Qatysyp qana qoımaı ol jerden qala ákiminiń syılyǵy men arnaıy nomınasııasyn jeńip ákelgen. Kelgennen keıin búgingi kúnniń mańyzdy máselesi - balalardyń smartfonǵa táýeldiligin ashyp kórsetetin «Asqar men asyq» atty ertegini sahnalaýǵa kiristi.
Teatr trýppasynyń negizgi quramy Aqan seri atyndaǵy Joǵary mádenıet kolledjiniń stýdentterinen jasaqtalǵan. Sáıkesinshe ujymdaǵy kolledj stýdentteri oqý bitirgen soń iri qalalardaǵy óner ordalaryna oqýǵa tústi. Birazy ár óńirdegi teatrlarǵa jumysqa ornalasty. «EL Jastar» teatrynyń jastary óz joldaryn taýyp, óner jolyndaǵy bıik maqsattarymen, asqaq armandaryna jol tartqany qýantady.
Teatrdyń art-dırektory Hákim Hasanbaı men kórkemdik jetekshisi Farhadbek Kanafın namysqa tyrysyp, bıyl oqý jyly bastalysymen taǵy da sol kolledj stýdentterinen iriktep, jańa trýppa quryp shyqqan. Bıylǵy jyldy Abaı jyly dep belgilegen sátten bastap aqyn shyǵarmashylyǵyn nasıhattaý maqsatynda performans janryndaǵy «Jastyqtyń oty, qaıdasyń?!» atty spektakli daıyndalǵan. Tipti Kókshetaýdaǵy Abaı jyly aqpan aıynyń basynda osy qoıylymmen ashylypty.
Bul qoıylymǵa úsh aı ýaqytyn sarp etken qos mamannyń eńbegi zor. Osyndaı kezde joǵaryda atalǵan mádenıet kolledjiniń dırektory Quralaı Ǵazızqyzy qol ushyn berip, qoldaý tanytqan. Ol kolledj qabyrǵasynda oqıtyn talantty jastardyń uıymdasyp, úlken iske bilek sybana kiriskenin kógen soń, daıyndalýlaryna barynsha jaǵdaı jasaǵan. Sahna, kostıým, baletmeıster, dybys, jaryq operatory da san qyrly maman daıarlaıtyn osy kolledjden tabyla ketken. Premeraǵa kelgen el aǵalary jastardyń ónerge degen mahabbatyn kórip, alǵystaryn aıtyp, batalaryn da beripti. Kókshetaýdaǵy Janaıdar Mýsın atyndaǵy joǵary qazaq pedagogıkalyq kolledjiniń dırektory Nurtas Ahatuly 250 myń teńge kóleminde sertıfıkat tabys etse, Quralaı Ǵazızqyzy 180 myń teńge kóleminde sertıfıkat tabystaǵan. Bul janashyrlyqtan týǵan qoldaý.
«EL Jastar» teatry Abaıǵa arnalǵan spektaklmen Kókshetaý oblysyndaǵy aýdan men qalalardy aralap shyǵamyz degende koronavırýstyń saldarynan is-sharalarǵa tyıym salynyp, teatrdyń aıaǵy tusalyp qaldy. Dese de olar osy sátte shyǵarmashylyq izdenis ústinde júrgenderin aıtady.
«EL Jastar» teatry Abaıǵa arnalǵan osy spektalmen oblystaǵy aýdandar men qalalardy aralap shyǵýdy josparlap otyr. Sondaı-aq, qaı jaqta teatr festıvali ótse, soǵan qatyspaq oılary bar jastardyń qulaǵy túrik. Bıylǵy jyldan kúteri kóp ónerli jastardyń úmiti óshpeı, jigeri jasymasa eken deımiz.