Fýtboldan Qazaqstan quramasy 2014 jylǵy álem chempıonaty irikteý týrnıri aıasynda Farer araldary komandasymen kezdesip, 2:1 esebimen jeńiske jetti. Bul – bizdiń quramanyń irikteý týrnıri aıasyndaǵy alǵashqy jeńisi bolsa, jyl basynan bergi ekinshi jeńisi.
Fýtboldan Qazaqstan quramasy 2014 jylǵy álem chempıonaty irikteý týrnıri aıasynda Farer araldary komandasymen kezdesip, 2:1 esebimen jeńiske jetti. Bul – bizdiń quramanyń irikteý týrnıri aıasyndaǵy alǵashqy jeńisi bolsa, jyl basynan bergi ekinshi jeńisi.
Bul kezdesý asa tartysty jáne qyzyqty ótti deı almaımyz. Bizdiń qurama oıyndy belsendi bastap, birinshi taımda qarsylastar qaqpasyna birneshe qaýipti jaǵdaı jasaǵanymen, Farer araldaryna bir goldyń ózin soǵa almaı ketti. Birinshi taımda esepti, kerisinshe, qarsylastar ashty. Kezdesýdiń 22 mınýtynda Froýdı Benıamınsen bizdiń qorǵanystaǵy qatelikti utymdy paıdalanyp, Sıdelnıkovtiń torkóz qaqpasyna goldy toǵytty. Mundaı jaǵdaıdy eshkim kútpegeni belgili. Osy kezde stadıonǵa jınalǵan jankúıerler ýlap-shýlap, quramanyń oıynyna narazylyqtaryn bildirip jatty. Osydan keıin manadan beri alaqandaı araldyń jigitterin qalpaqpen ońaı uryp alamyz degen otandastarymyz esterin jınap, qaıta shabýyldaýǵa kóshti. Biraq, oıynnyń birinshi jartysynda tablodaǵy esep sol kúıinde ózgerissiz qaldy.
Al ekinshi taımda san-marınolyq bas tóreshi bizge goldy syılady dese bolady. Oıyn endi ǵana bastalǵanda Farer araldarynyń qorǵaýshylary óz aıyp alańynda Hıjnıchenkony qulatty. Bas tóreshi birden 11 metrlik aıyp núktesin nusqady. Osy sátti bizdiń jigitter paıdalanyp, esepti teńestirdi. 11 metrlik aıyp dobyn mektepti «Altyn belgimen» bitirgen Qaırat Nurdáýletov sátti oryndady.
Aıtqandaı, matchtan soń Farer araldarynyń bas jattyqtyrýshysy komandasynyń jeńilisine bas tóreshini aıyptap, penaltıdiń bolmaǵanyn aıtty. Al oıynǵa qaıta kelsek, esep teńesken soń, bas jattyqtyrýshy Beranek shabýyl shebin kúsheıtý úshin alańǵa Fınonchenkony shyǵardy. Ol birden oıynǵa aralasyp, qarsylastar qaqpasyna maza bermedi. Sondaı kezdiń birinde, ıaǵnı oıynnyń 65 mınýtynda ol ekinshi goldyń avtory atandy. Oǵan pasty «Shahterdiń» taǵy bir shabýylshysy Sergeı Hıjnıchenko berdi. Sóıtip, bizdiń qurama «Shahterdiń» osy dýetiniń arqasynda jeńiske jetti deýge de bolady.
Bul matchta kópten beri ulttyq quramaǵa shaqyrylmaı kelgen «Tobyldyń» shabýylshysy Nurbol Jumasqalıev óner kórsetti. Birden aıtý kerek, jaman oınaǵan joq. Qaıta onyń ornyna alańǵa shyqqan Sergeı Ostapenkonyń oıyny kóńilimizden shyqpady. Hıjnıchenko bolsa, jarady. Ol taǵy Fınonchenko ekeýi bir-birimen birden túsinise alatyndaryn kórsetti.
Endi 10 qyrkúıekte Shvesııa quramasyn qabyldaımyz. Olar Astanaǵa aldyna Zlatan Ibragımovıchti salyp kele jatyr. Bul kezdesýdiń jóni tipten bólek bolatyny sózsiz. Shvesııa, qalaı degenmen, Danııa koroldiginiń avtonomııasy sanalatyn Farer araldary emes.
Dastan KENJALIN,
«Egemen Qazaqstan».
––––––––––––––
Sýretterdi túsirgen
Orynbaı BALMURAT.