Juqpaly indettiń jamanat habary shyqqaly el ishine alań kirgeni ras. Aldymen aınalamyzdaǵy adamdardyń, úıdegi bala-shaǵamyzdyń amandyǵyn tilep, saqtyqty kúsheıttik. Prezıdent Qasym-Jomart Toqaevtyń Jarlyǵymen Tótenshe jaǵdaı jarııalanyp, koronavırýstyń taralýyna tosqaýyl bolatyn sharalar qabyldanǵaly sharýany jıyp qoıyp, úıden shyqpaýdy uıǵardyq.
Bul dertti jeńýdiń birden bir joly – árkim óz otbasyn oqshaýlap, beısaýat júristi tyıý. Aýyl-aımaq bolyp osy erejege baǵyndyq. Árıne bizdiń tirshiligimiz saýda-sattyq pen qyzmet kórsetý salasyndaǵy shaǵyn jáne orta bıznes salasyna jatatyndyqtan, jumysymyzdy toqtatyp, tabyssyz qalý ońaı bolǵan joq. Alakól aýdany boıynsha shaǵyn kásippen aınalysatyn ár adam keminde birneshe jumysshyny jumyspen qamtyp otyrǵan bolatyn. Tótenshe jaǵdaıǵa baılanysty olar da kúndik tabysynan aıyryldy. Osy sátte memleket qıyndyqpen betpe-bet qaldyrmaı, tabys tabý múmkindiginen ýaqytsha qol úzgen sanatqa qol ushyn sozdy. Áleýmettik qordan tólenetin 42500 teńge ótemaqyny aldym. Qaramaǵymda jumys isteıtin adamdar da tólemaqyǵa qujat ótkizip, aqsha alyp jatyr. Qıyn qystaý kezde qarapaıym halyqtyń qamyn oılaǵan el aǵalaryna alǵysymyz sheksiz.
Elena TÝNIаKINA,
jeke kásipker
Almaty oblysy,
Alakól aýdany