Juqpaly indet qaýipi el ishin ábigerge saldy. Karantınge baılanysty óndiristegi jumys ýaqyty qysqaryp, bazardaǵy saýda-sattyq toqtady. Adamdardyń tabysy azaıdy. Bul synaq ásirese kópbalaly otbasylarǵa salmaq bolyp túsip tur.
Osy júkti memleket tarapynan beriletin kepildendirilgen áleýmettik kómek kólemi sál de bolsa jeńildetip turǵanyn aıtýymyz kerek. Bul baǵytta Almaty oblysynda áleýmettik turǵyda az qamtyl áýleter men kópbalaly otbasylardy qajetti azyq-túlik paketterimen qamtý úshin 455 mln teńge qarastyrylyp, qazirge deıin 83 myńnan astam turǵynǵa kómek kórsetilgen. Bul kómek qysyltaıań shaqta qalanyń da, aýyldyń da muqtaj adamdaryna kádimgideı qoldaý bolyp otyr. Mysalǵa, Kegen aýdany boıynsha ataýly áleýmettik kómek alatyn otbasylarǵa járdemaqydan bólek zattaı qoldaý paketi de beriledi eken. Búginde 1 – 3 jas aralyǵyndaǵy 31 sábıge jáne 3-6 jas aralaǵyndaǵy 30 balaǵa kepilderdirilgen áleýmettik paket taratylypty.
Dál osyndaı ıgi shara Tekeli qalasynda da jalǵasyp jatyr. Qala ákimdiginiń esebi boıynsha, 281 otbasyndaǵy 309 balaǵa «Balalarǵa tartý» áleýmettik paketi berilipti.
- Jaqynda Tekeli qalasynyń ákimdiginen erikteler kelip, úıimizge azyq-túlik, basqa da tutynýǵa qajetti zattar, medısınalyq kerek-jaraq jetkizip berdi. Shyn qýandyq. Elep,eskerip qol ushyn bergen azamattarǵa alǵysymyz shekisz. Otbasymyzda 5 bala ósirip otyrmyz. О́zim ataýly áleýmettik kómek alamyn. Qosymsha kásibimizdiń toqtaýyna baılanysty kiris kózi de qysqarǵan edi. Memleket taǵy da qıyndyqta qaldymaı, arnaıy taǵaıyndaǵan 42 500 teńge ótemaqy berdi. Bárinen ákimdik bergen «Balalarǵa tartý» degen áleýmettik paket otbasyndaǵy kishkentaılar úshin laıyqty syı boldy. Muny uıymdastyrǵan demeýshilerge, kópbalaly analarǵa barlyq jaǵynan kómek berip, qarjylaı da, azyq-túlik túrimen de qoldap otyrǵan memleket tizginin ustaǵan jandarǵa analyq alǵysymdy arnaımyn. Qıyn kúnder artta qalyp, elimiz berekeli de beıbit ómirge qadam bassyn, - deıdi bizben qýanyshyn bólisken tekelilik kóp balaly ana Ásel Erdenbekova.
Almaty oblysy