Qazaqstan halqy Assambleıasynyń ǵylymı-sarapshylyq keńesi til máselesine erekshe nazar aýdaratyn bolady. Bul týraly Nur.kz tilshisi habarlady.
Aqordada Memlekettik hatshy Marat Tájınnyń qatysýymen ótken Qazaqstan halqy Assambleıasy Ǵylymı-sarapshylyq keńesiniń keńeıtilgen otyrysy barysynda jýrnalısterge keńes tóraıymy Aıgúl Sádýaqasova osylaı málimdedi.
Keńes otyrysy «Qazaqstan-2050» Strategııasy aıasyndaǵy Qazaqstan halqy Assambleıasynyń ǵylymı-sarapshylyq keńesi men memlekettik organdardyń jańa ǵylymı-saraptamalyq jumysyndaǵy basym mindetteri jáne Qazaqstan halqy Assambleıasynyń 2020 jylǵa deıingi damý tujyrymdamasy taqyrybyna» arnaldy.
Shara aıasynda atqarylǵan jumystarǵa toqtalǵan keńes tóraıymy, termınologııa isin bir júıege keltirý máselesine erekshe nazar aýdarylǵanyn aıtty. Onyń sózine qaraǵanda, bul baǵytta on shaqty ǵalym jumys istep, byltyrǵy jyly «Qazaqstan Respýblıkasynyń memlekettik etnosaıasat ımperatıvteri» atty memlekettik qyzmetshilerge jáne sarapshylarǵa arnalǵan baspa ónimin shyǵarǵan.
«Ǵylymı- saraptamalyq keńes qolǵa alǵan taǵy bir joba - «Tarıh úshin taǵzym» jobasy. Osynaý úlken jobany 2009 jyly Assambleıa qolǵa alǵan bolatyn. Sonyń ishinde deportasııaǵa ushyraǵan halyqtar, saıası qýǵynmen kelgen azamattardyń ómiri týraly derek izdep, jınap, urpaǵynan suhbat alyp, úlken eki kitap shyǵardyq. Derekti fılm de túsirdik», - deıdi A. Sádýaqasova. Onyń aıtýynsha, ǵylymı-saraptamalyq keńes til máselesine de erekshe nazar aýdarady. Atap aıtqanda, keńes ǵalymdary, lıngvıster memlekettik tildi jetildirýge baǵyttalǵan jobalar usyndy. «Olar qazirgi tańda jaryq kórdi, sonyń negizinde qazir tikeleı praktıkalyq usynystar daıyndalyp jatyr. Sonymen qatar saıasattaný ǵylymy da nazarymyzda. Saıası júıeni jańǵyrtý kezeńinde qandaı ózgerister bolady, qoǵam oǵan qalaı beıimdeledi, saıası júıeniń ishindegi Assambleıanyń róli jáne atqaratyn qyzmetterin anyqtap bergen jumystarymyz barshylyq», - dedi A. Sádýaqasova.
Sáken Maılybaı.