Qazaqstannyń fýtboldan Premer-lıgadaǵy chempıonatynyń 27-týryn búgin, 22 qyrkúıek kúni keshke Almatyda jergilikti «Qaırat» pen Qaraǵandynyń «Shahter» komandalary arasyndaǵy kezdesýmen aıaqtaldy. Bul týraly Egemennews.kz tilshisi habarlady.
Matchtyń birinshi taımynda qonaqtar eptep basymdyq kórsetkenimen, nátıjege jetken alań ıeleri boldy. Olar 32-mınýtta gambııalyq forvard Momedý Sısseıdiń kúshimen birinshi goldy soqty. Ol Qazbek Geterıevtiń pasyn óte jaqsy paıdalandy. Arada bar-joǵy 4 mınýt ótkende, almatylyqtar taǵy bir gol soǵyp, basymdylyqtaryn artyra tústi. Bul joly Vıtalıı Lı erledi. Onyń aıyp alańyna jaqyn jerdegi alań ortasynan urǵan soqqysyna qorǵaýshylar da, qaqpashy da tosqaýyl qoıa almady. Sonymen, qarsylastar 2:0 degen eseppen úziliske shyqty.
Al naǵyz tartys oıyn ekinshi taımda órnekteldi. Bul taǵy da qaırattyqtardyń esepti ulǵaıta túsýinen bastaldy. Kezdesýdiń 55-mınýtta Artýr Edıgarıan kenshiler qaqpashysy Stas Pokatılovtyń qaqpasyna taǵy bir dop jóneltip, esepti 3:0-ge jetkizdi. Jurttyń bári osydan keıin qaraǵandylyqtar jeńiliske kónetin shyǵar dep oılaǵan. Biraq olaı bolmaı shyqty. Buǵan, sirá, Vıktor Kýmykovtyń taım basynda eki birdeı oıynshyny almastyrǵany da sebep bolǵan shyǵar.
Qaraǵandylyqtar úshin úmit otyn jandyrǵan komanda kapıtany Andreı Fınonchenko boldy. Ol aldymen birinshi, sosyn ekinshi golyn soǵyp, komandalastaryn jigerlendire tústi. Al qaraǵandylyqtardyń sońǵy golyn oıynǵa qosylǵan qosymsha ýaqytta Igor Zenkovıch saldy. Sóıtip, esep 3:3 bolyp aıaqtaldy.
Eske sala keteıik, Qazaqstan birinshiliginde bul komandalar buǵan deıin ózara 42 ret kezdesken eken. Sonyń 18-inde «Shahter», 17-sinde «Qaırat» jeńip, 7 match teń aıaqtalǵan. Dop aıyrymy: 52-51 - almatylyqtardyń paıdasynda bolǵan. Endi 55-54 boldy.
Taǵy da eske sala keteıik, keshe osy týrdyń aldyńǵy oıyndary oınalyp ketken bolatyn. Ol mynadaı nátıjeler ákeldi:
«Aqtóbe» (Aqtóbe) – «Astana» (Astana) 2:0
Goldar: Kapadze (52), Haırýllın (90+6)
«Vostok» (О́skemen) – «Jetisý» (Taldyqorǵan) 0:0
«Taraz» (Taraz) – «Atyraý» (Atyraý) 1:1
Goldar: Obıora (36) – Alvız (66-penaltı)
«Aqjaıyq» (Oral) – «Tobyl» (Qostanaı) 1:3
Goldar: Cherny (78) – Kýrtıshı (7), Býgaev (20, 74).
«Ertis» (Pavlodar) – «Ordabasy» (Shymkent) 3:0
Goldar: Baqaev (48-penaltı), Mýhýtdınov (55), Chernyshov (75).
Kelesi týrdyń oıyndary 27 qyrkúıekte ótedi.
Damır Qojamqul.