Keshe, 22 qyrkúıekte tús aýa Qyzylorda oblysyna jumys saparymen kelgen Qazaqstan Respýblıkasynyń Prezıdenti Nursultan Nazarbaev búgingi jumys kúnin oblys ortalyǵynda jańadan salynǵan birqatar nysandardy aralap kórýden bastady. Bul týraly Egmenenews.kz tilshisi habarlady.
Prezıdent aldymen «Muz aıdyny» sporttyq- saýyqtyrý keshenine bardy. Jalpy kólemi 7985 sharshy metrlik keshen 3 bólikten turady. Qazirgi zaman talabyna saı salynǵan ortalyqta hokkeı, mánerlep syrǵanaý, short-trek syndy qysqy sport túrlerin damytýǵa bolady. Onda muz aıdynynan bólek, gandbol, voleıbol, basketbol, kúres jáne kórkem gımnastıkaǵa seksııalary úshin jabdyqtar men zaldar qarastyrylǵan. Keshende bolǵan Memleket basshysy eki dúrkin Olımpıada chempıony Ilıa Ilın bastaǵan oblys sportshylarymen kezdesti.
Elbasy budan keıin «Bastaý» bıznes ortalyǵyna toqtady. Onda saǵatyna 250 jolaýshyǵa qyzmet kórsetetin halyqaralyq jolaýshylar termınalynyń jobasy tanystyryldy. Jalpy aýmaǵy 9200 sharshy metr bolatyn jańa áýejaı halyqaralyq standarttarǵa sáıkes salynyp, jolaýshylarǵa kórsetiletin qyzmet sapasy artady. Jospar boıynsha qurylys jumystaryn 2014 jyldyń kúzine deıin aıaqtaý kózdelgen. Bul áýejaıdaǵy ushaqtardyń ushyp qoný alańy 3 jyl buryn qaıta jańǵyrtýdan ótip, halyqaralyq talaptarǵa sáıkestendirilgen.
Prezıdenttiń jurtshylyq ókilderimen ótken jıynynda oblys ákimi Qyrymbek Kósherbaev óńirdiń ózekti máselelerine toqtalyp, «Qyzylorda oblysynyń 2020 jylǵa deıingi áleýmettik-ekonomıkalyq damýy Strategııasy» qujatynyń negizgi baǵyttarymen tanystyrdy.
Kezdesýde«Rza» aksıonerlik qoǵamynyń prezıdenti S. Imandosov, «Atameken Odaǵy» UEP janyndaǵy oblystyq kásipkerler keńesiniń tóraǵasy A. Mahambetov, «QazGerMunaı» birlesken kásiporynnyń bas dırektory M. Kárim, «Baıqońyr» ÁKK» UK» AQ basqarma tóraıymynyń orynbasary I. Seıdahanov, balyq sharýashylyǵyn damytý jónindegi oblystyq konsorsıým tóraǵasy Á.Aıymbetov jáne Qorqyt Ata atyndaǵy Qyzylorda memlekettik ýnıversıtetiniń rektory Q. Bısenov sóz alyp, memlekettik, ásirese ınfraqurylymdyq baǵyttaǵy baǵdarlamalardyń aımaq ekonomıkasyna oń yqpaly týrasynda, Qazaqstan Prezıdentiniń tapsyrmasy boıynsha júzege asqan jobalar jóninde oı pikirlerin bildirdi.
Erjan Baıtiles,
«Egemen Qazaqstan».
Qyzylorda.