Keshe Premer-Mınıstr Serik Ahmetov Reseı Federasııasynyń Sochı qalasynda ótken Ujymdyq qaýipsizdik sharty uıymynyń Ujymdyq qaýipsizdik keńesi sessııasyna qatysty.
Keshe Premer-Mınıstr Serik Ahmetov Reseı Federasııasynyń Sochı qalasynda ótken Ujymdyq qaýipsizdik sharty uıymynyń Ujymdyq qaýipsizdik keńesi sessııasyna qatysty.
Sochı – 2014 jyly qysqy Olımpıada ótetin oryn retinde búginde búkil álemge áıgili qala. Onda qazir aldaǵy aqpanda bolatyn osynaý iri sporttyq sharaǵa daıyndyq jumystary qyzý júrip jatyr. Keshe Úkimet basshysy S.Ahmetov saparynyń basyn osynda Olımpıada qarsańynda salynyp jatqan birqatar sporttyq nysandardy aralaýdan bastady. «Bolshoı» muz saraıyna atbasyn buryp, «Adler-Arena» konkı keshenin baryp kórdi. Sondaı-aq, «Aısberg» muz sport saraıyn aralady. Premer-Mınıstr Sochıdiń Olımpıadaǵa daıyndyǵyn joǵary baǵalady. Oıyndardyń bıik deńgeıde ótetinine kúmánsiz ekenin aıtyp, Olımpıada ótkizýge tabys tiledi.
S.Ahmetovtiń atalmysh sport nysandaryna arnaıy barýy tegin emes. Sebebi, bolashaqta qysqy Olımpıada oıyndaryn óz elinde ótkizýge Qazaqstannyń da úmiti bar. Árıne, Astanada Azıada oıyndaryn oıdaǵydaı ótkizgen el aldaǵy ýaqytta Almatyny da Olımpıada oıyndarynyń alańyna aınaldyra alar edi. Bul jóninde Elbasy da jıi aıtyp júr. Almatyda álemdik sharany ótkizýge múmkindik mol, qolaıly jaǵdaı bar degen bolatyn Prezıdent bir sózinde. Tek uıymdastyrýshylar tarapynan qoldaý tapsa bolǵany.
Sonymen, S.Ahmetov keshe túske deıin Sochıdiń sport nysandaryn aralap, kúnniń ekinshi jartysynda Ujymdyq qaýipsizdik keńesiniń sessııasyna qatysty. Sessııa otyrysyna uıymǵa múshe memleketter basshylary – Reseı Prezıdenti Vladımır Pýtın, Armenııa Prezıdenti Serj Sargsıan, Belorýssııa Prezıdenti Aleksandr Lýkashenko, Qyrǵyzstan Prezıdenti Almaz Atambaev, Tájikstan Prezıdenti Emomalı Rahmon túgel kelipti. Al S.Ahmetov Prezıdenttiń tapsyrysy boıynsha Qazaqstan atynan bardy.
Sessııa jumysy aldymen shaǵyn quramdaǵy kezdesýden bastaldy. Onda prezıdentter jeke-jeke sóz alyp, Ujymdyq qaýipsizdik keńesi jumysyna qatysty usynystary men oılaryn ortaǵa saldy. Qazaqstan Prezıdenti atynan S.Ahmetov sóıledi. Sóz basynda sessııany uıymdastyrýshylar men uıym tóraǵalyǵyndaǵylarǵa Elbasy Nursultan Nazarbaevtyń alǵysyn aıtyp, sálemin jetkizdi. Odan ári Ujymdyq qaýipsizdik sharty uıymynyń kún tártibinde turǵan ózekti máselelerge oraı Qazaqstannyń ustanymdaryn jetkizdi. Qazaqstan Ujymdyq qaýipsizdik sharty uıymynyń damýyna erekshe yqylasty ekendigin aıtyp, uıym aldynda turǵan mańyzdy máseleler – Aýǵanstan ahýaly, «Talıban» qozǵalysyna qatysty jaǵdaılardyń Ortalyq Azııanyń 2014 jyldan keıingi damýyna keri áserin tıgizetini jaıynda oılantatynyn atap ótti. Qazaqstan qazirgi tańda bolyp jatqan jahandyq jaǵdaılarǵa qatysty Ujymdyq qaýipsizdik sharty uıymynyń ustanǵan baǵyttaryn qoldaıtynyn aıta kelip, Sırııadaǵy jaǵdaıǵa baılanysty Qazaqstannyń ustanymyn jetkizdi.
«Biz Sırııadaǵy jáne onyń aınalasyndaǵylarǵa qatysty qabyldanǵan málimdemelerdiń bárin qoldaımyz. Qazaqstandyq tarap sırııalyq bıliktiń hımııalyq qarýdy halyqaralyq qadaǵalaýǵa berý týraly sheshimi ondaǵy qantógis qaqtyǵystardy toqtatyp, Sırııadaǵy jaǵdaıdy turaqtandyrýǵa septigin tıgizedi dep úmittenedi. Bul rette «Jeneva-2» konferensııasynyń ótýi Sırııanyń saıası jaǵdaıyna qatysty máselelerdi yntymaqtastyq turǵyda, ashyq pikirlese otyryp sheshýge múmkindik beredi dep esepteımiz», dep atap ótti S.Ahmetov.
Sessııa jumysy budan ári keń quramdaǵy otyryspen jalǵasty. Shaǵyn quramdy otyrysta kóterilgen máseleler aýqymdy túrde talqylandy.
Ujymdyq qaýipsizdik sharty uıymy – áskerı-saıası saladaǵy TMD memleketteriniń basyn biriktirip turǵan mańyzdy qurylym. Quramynda Qazaqstan, Armenııa, Belarýs, Qyrǵyzstan, Reseı, Tájikstan syndy alty memleket bar.
Uıym ótken jyly on jyldyǵyn atap ótken bolatyn. On jyldyń ishinde bul uıym ekinshi NATO atanbasa da, aımaqty qoıyp, álemdik deńgeıde aıryqsha orny bar qurylymǵa aınaldy deýge negiz bar. Bastapqyda lańkestikpen kúresip, esirtki saýdasyn quryqtaý úshin qurylǵan uıym óziniń onjyldyq tarıhynda elder qaýipsizdigin qamtamasyz etý jolynda biraz jumys atqardy.
On jyldyq damýdy artqa tastaǵan Ujymdyq qaýipsizdik sharty uıymy qazirgi tańda óziniń jańa damý jolyna tústi dese bolatyndaı. Iаǵnı ótkendi baǵalap, kemshin tusty saralaı kele, zamanaýı talaptarǵa saı mańyzdy sharalardy qolǵa aldy. Esterińizde bolsa,