Almatyda kezekti kıno merekesi márege jetti. Qazylar alqasynyń tóraǵasy jańazelandııalyq jazýshy ári rejısser Djeın Kempıon hanym Bas júlde rejısserler Nannı Ekvtımıshvılı men Sımon Grosstyń «Sheshek atqanda» (Grýzııa) atty fılmge laıyq dedi. Al ótken jyly «Eýrazııa» kınofestıvaliniń bas júldesi eshkimge buıyrmaǵan bolatyn.
Almatyda kezekti kıno merekesi márege jetti. Qazylar alqasynyń tóraǵasy jańazelandııalyq jazýshy ári rejısser Djeın Kempıon hanym Bas júlde rejısserler Nannı Ekvtımıshvılı men Sımon Grosstyń «Sheshek atqanda» (Grýzııa) atty fılmge laıyq dedi. Al ótken jyly «Eýrazııa» kınofestıvaliniń bas júldesi eshkimge buıyrmaǵan bolatyn.
Al «Eń úzdik áıel róli» júldesine «Meniń apa-sińlilerim» (Germanııa) kartınasyndaǵy Iordıs Trebel men «Mazalanba, Sara» (Iran) fılmindegi Elahe Hızarıge bólip berildi. Al, eń úzdik er adam júldesine «Ilo Ilo» (Sıngapýr) kartınasyndaǵy Ko Dja Ler men «Súıiktim» atty fılmdegi Karlo Sechchı (Italııa) ıe boldy.
Otandyq týyndylar ishinen Serik Aprymovtyń «Baýyr» atty kartınasy «Eń úzdik rejıssýra» nomınasııasymen marapattaldy. Jerlesimizdiń aıtýynsha, júldeli fılmdi ol «Japyraqtar sybdyry» atty kartınasymen qatar túsiripti. Aptanyń bes kúninde atalmysh fılm, qalǵan eki kúninde «Baýyr» túsirilip otyrǵan. Eki kartına da bir dekorasııada jáne bir ǵana akterlerdiń quramymen oryndalǵan.
Osy arada jyl saıyn negizgi Qazylar alqasynyń sheshiminen bólek, FIPRESSI men NETPAK júldeleri de óz úzdikterin taýyp jatatyndyǵyn aıta ketelik. Bıyl FIPRESSI qazylar alqasynyń qurmetine Germanııa men Saýd Arabııasy birigip túsirgen «Vadjda» fılmi, NETPAK qazylar alqasynyń júldesine joǵaryda atalǵan «Baýyr» men Reseı, Qazaqstan, Germanııa jáne Fransııa birigip túsirgen «Teńizdi kútý» fılmderi laıyq dep tabyldy.
Bir qyzyǵy, bıylǵy «Eýrazııa» kınofestıvaliniń sońǵy baspasóz máslıhatynda jýrnalısterdi ǵana emes, festıvaldiń jumysyn jandandyrýǵa atsalysqan eriktiler, áýesqoı fotograftar, men blogerlerge tosyn syı kútip tur eken. Festıval demeýshisi «KIT Group» kompanııasy úlken mádenı shara jumysyn joǵary kásibı turǵyda kópshilikke jarııalap, taratqany úshin BAQ ókilderine dıplomdar men baǵaly syılyqtar tabystady. Olardyń arasynda «Eýrazııa» Birinshi arnasy, «Habar» agenttigi, «Ekspress K», «Novoe pokolenıe», «Ognı Alataý», «Komsomolskaıa pravda v Kazahstane» gazetteri jáne ózge de buqaralyq aqparat quraldary bar.
Buǵan deıin habarlanǵandaı, mádenı sharadaǵy basty mańyzdy oqıǵasy «Qazaqstandyq kınojobalar bazary» boldy. Ekinshi jyl qatarynan osynaý bıznes-alań jas rejısserlardyń jańa jobalaryna baspaldaq bolyp otyr. Bıyl kınematografısterge arnalǵan qarjylaı qoldaýǵa Ádilhan Erjanovtyń «Alııýshkasy» men Serik Ábishevtiń «Ademoka» jobalary ıe boldy.
Festıvaldiń taǵy bir arnaýly júldesi VGIK rektory, reseılik «Ar» kartınasynyń prodıýseri Vladımır Malyshevqa berildi. Ol Qazaqstan kınoónerin damytyp, qazaq kınosynyń álemdik festıvaldardan saltanat qurýyna qoldaý kórsetip kele jatqan Memleket basshysy Nursultan Nazarbaevqa erekshe alǵys bildirdi.
Toǵyzynshy halyqaralyq «Eýrazııa» kınofestıvaliniń prezıdenti, Sh.Aımanov atyndaǵy «Qazaqfılm» AQ prezıdenti Ermek Amanshaev otandyq kınonyń basy-qasynda júrip, onyń alǵa ilgerileýine úles qosqan ulttyq kınematografıster men festıvaldiń aıtýly qonaqtaryna alǵys bildire otyryp, kelesi jyly «Eýrazııa» kınofestıvali alǵashqy mereıtoıyn atap ótetindigin eske saldy.
Aınash ESALI,
«Egemen Qazaqstan».
ALMATY.