Qant qyzylshasyn egetin sharýalar men «Merki qant zaýyty» kásipornynyń arasyndaǵy qarajat máselesine baılanysty daý áli sheshilmeı keledi.
Atalǵan máselege oraı, Jambyl oblysynyń ákimi Berdibek Saparbaev óńirdegi qant qyzylshasyn ósirýmen aınalysatyn sharýa qojalyq taǵy da basshylarymen kezdesti. Kezdesý barysynda «Merki qant zaýyty» JShS-niń aýylsharýashylyq taýar óndirýshileri aldyndaǵy bereshegin óteý, sondaı-aq, qant óndirý salasyn odan ári damytý jáne qoldaý máseleleri ózara talqylandy.
«Biz «Merki qant zaýytynyń» basshylyǵymen kelissózder júrgizip jatyrmyz. Bul máseleni sheshý úshin bıýdjetten 180 mıllıon teńge bólindi. Bizdiń alǵashqy kezdesýimizde qant zaýytynyń qaryzy 1 mıllıard teńgeden asatyndyǵy aıtylǵan. Búginge deıin sizderge 640 mıllıon teńgeden astam qarjy tólense, zaýyt basshylyǵy kelesi aptada taǵy 135 mıllıon teńgeni óteıtindigine sendirip otyr. Bul másele bizdiń baqylaýymyzda bolady», dedi Berdibek Saparbaev. Sonymen qatar, ol fermerlerdi birigýge shaqyryp, qyzylsha ósirýshiler qaýymdastyǵyn qurýdy usyndy. «Biz sizderdi árqashan qoldap keldik, aldaǵy ýaqytta da qoldaıtyn bolamyz. О́z kezekterińizde sizderdiń de birigip, qaýymdastyq quryp, egis alqabyn kóbeıtýlerińiz mańyzdy. Oblys aýdandarynan birneshe qant shyǵaratyn shaǵyn zaýyttardyń qurylysyn salýdy qarastyrý qajet. Bul iste sizderge «Taraz» áleýmettik-kásipkerlik korporasııasy qol ushyn beredi. Bizdiń mindetimiz – búkil Qazaqstandy qantpen qamtamasyz etip qana qoımaı, sonymen qatar eksportqa ónim shyǵarý», - dedi Berdibek Saparbaev.
Jambyl oblysy