STÝDENTTER TABYSPEN ORALDY

Naýryz aıynyń 23-29 araly­ǵynda T.Júrgenov atyndaǵy Qazaq ulttyq óner akademııasynyń bir top stýdentteri men ustazdary Túr­kııa eliniń Eskishehır qalasynda ótken V balalar men jastar teatr­lary jáne Ankara qalasynda bol­ǵan IV halyq­ara­lyq teatr festı­val­derine qaty­syp qaıtty. Atal­mysh oqý oryny­nyń teatr óneri fakýltetiniń 4 kýrs stýdentteri bul óner saıysynda qazaqtyń uly jazýshysy M.Áýezov­tiń “Aıman-Sholpan” pesasy negizinde sahnalanǵan qoıylymdy kórsetipti. On jeti stýdentti bastap bul saparaǵa akademııa oqytýshylary D.Turanqulova, L.Altybaeva, T.Kóbekov barypty. О́nerdegi óreli tabyspen, mol qýanyshpen oralǵan akademııa stý­dentteriniń Túrkııadan alǵan áser­leri jeterlik. Baýyrlas eldiń tórin­de shalqyta kúı shertip, tógilte án aıtyp, myń buraltyp bı bılegen. Festıvalge qatysqan Bolgarııa, Fransııa, Gollandııa, Rýmynııa, Reseı, Tatarstan syndy memleket­termen ıyq tirestire óner kórsetipti. Túrkııa elinde ótken osy teatr festıvaline akademııa stýdentteri “Túrksoı” halyqaralyq uıymynyń prezıdenti Dúısen Qaseıinovtiń koldaýymen qatysyp, úlken tabysqa qol jetkizipti. Talantty jastardyń ustazy, professor D.Turanqulova: “Bul saparda biz óner kórsetýmen qatar, Túrkııa eliniń mádenıetimen, rýhanııatymen,tynys-tirshiligimen, salt-dástúrimen tanystyq. Biz óner kórseter tusta alty júz oryndyq teatr zalynda ıne shanshar oryn bolmady. Kire alma­ǵan kórermender syrtqa qoıylǵan ekrannan tamashalady”, – deıdi. О́ner álemine qanat qaqqan ozyq oıly shákirtter sapardan alǵan áserlerin jarysa baıandaıdy. Eka­terınbýrg qalasynda ótken ǵylymı konferensııanyń jeńim­pazy, talantty jas Maqsat Sábıtov: “Túrik jerinen alǵan taǵylym aldaǵy ýaqyt­ta bizdiń shyǵarmashylyǵymyzǵa zor shabyt syılaıdy dep senemiz. Túrik jastarynyń óz ana tilderine, salt-dástúrlerine degen qurmetteri orasan eken. Mysaly, umyt bolǵan toǵyzqumalaq oıynyna arnalǵan ǵımaratty úsh túrik azamaty óz qarajattaryna salyp, ulttyq qundylyqty jańǵyrtypty. Osy oraıda, orta ǵasyrlardy Qazaq­standa “Erbý” atty sýǵa sýret salý óneri bolǵandyǵyn sol jaqtan estip keldik. Endi nege bizge “Erbý-emirený”degen ónerimizdi qaıta jańǵyrtpasqa!? Úsh túrik jigitiniń qolynan kelgen is bizdiń qazaqtyń qolynan nege kelmesin?” – deıdi. Ankaranyń alańynda Márııam Jagorqyzynyń “Dýdaraı” ánin shyrqap, barsha áleýmetti aýzyna qaratqan Syrymbet Bıbosynov: “Halyq ándi uıyp tyńdady. Allaǵa shúkir, ánnen keıingi halyqtyń qoshemetin kórseńiz. Bul kýrs jetekshisi, aıtýly óner qaıratkeri, professor M.Baıserkenovtiń eńbek jemisi der edim. Bir sózben aıtqanda, sapardan alǵan áserimiz óte keremet!” – dep, sózin qysqa qaıyrdy. Jastar osy sapardyń júzege asýyna birden-bir septigin tıgizgen akademııa rektory A.Muhamedıulyna jáne onyń usynysyn qoldaǵan Túrksoı halyqaralyq uıymynyń prezıdenti D.Qaseıinovke sheksiz rızashylyqtaryn bildiredi. Sátti saparlar taýsylmaı, tátti syrlar úzilmesin! Súleımen MÁMET.