23 maýsymda memlekettik qyzmetshiler ózderiniń kásibı merekesin atap ótedi. Almaty ákimi Baqytjan Saǵyntaev óziniń Twitter-degi paraqshasynda memlekettiń qyzmetshi jumysynyń negizgi qaǵıdalaryn atap ótti, - dep habarlaıdy Egemen.kz
"Memlekettik qyzmetshi kúnimen quttyqtaımyn! Elge qyzmet etý – mártebeli mindet. Negizgi qaǵıdasy – óz isine adal bolyp, abyroı bıiginen kóriný. Eń bastysy – halyq únine qulaq asyp, el múddesi úshin eńbek etemiz. Densaýlyq pen tabys tileımin", dep jazdy B. Saǵyntav.
Eske salsaq, Baqytjan Saǵyntaev Almaty ákimi laýazymyndaǵy alǵashqy jumys kúni qala turǵyndaryna úndeý jasap, Facebook, Instagram jáne Twitter-de óziniń paraqshalaryn ashatyndyǵyn habarlaǵan bolatyn.
"Almaty árqaısymyzdyń júregimizden erekshe oryn alǵan qala, Almatyǵa degen ár qazaqstandyqtyń yqylasy erekshe. Meniń basty maqsatym – Almatynyń ár turǵyny berekeli ómir súretin, qaýipsiz de qolaıly, zamanǵa saı megapolıske aınaldyrý. Biz oǵan tek birge, tize qosyp eńbek etý arqyly jete alamyz. Sondyqtan Sizderdiń talap-tilekterińizdi bilip, ýaqytyly jaýap berý men úshin óte mańyzdy. Qalanyń problemalary men damý strategııasyn Sizdermen birge ashyq talqylaǵym keledi. Barlyǵymyzdyń taǵdyrymyzben baılanysty mańyzdy sheshimderdi ázirlep, qabyldaý kezinde sizderdiń qoldaýlaryńyz men úshin mańyzdy. Aqyldasa otyryp, birge jumys isteıik!", - degen bolatyn sol kezde qala ákimi.
B. Saǵyntaev áleýmettik jelilerdegi óziniń paraqshalarynda qala turǵyndaryna arnaǵan mańyzdy málimdemeler men úndeýlerdi jarııalaıdy, qabyldanǵan sheshimder týraly áńgimelep, azamattyq qoǵamdastyqty dıalogqa shaqyrady. Mysaly, Instagram-daǵy paraqshasynda 233 jazba jarııalaǵan, atalǵan paraqshanyń 253 myńnan astam oqyrmany bar. Facebook-taǵy oqyrmandar sany 13 myńnan astam, al Twitter-degi oqyrmandar qatary 3,5 myńnan asady.
El Prezıdenti atap ótkendeı "Estıtin memleket" qaǵıdasyna sáıkes qala ákimi azamattardy ákimdikte jáne Nur Otan partııasynyń qalalyq fılıalyndaǵy qoǵamdyq qabyldaýda jeke qabyldaıdy. Mundaı jeke qabyldaýlarǵa Almatynyń 181 turǵyny qatysty.
Megapolıs basshysy qala ákimi bolyp taǵaıyndalǵan kúnnen bastap qalanyń barlyq aýdandarynyń turǵyndarymen 16 kezdesý ótkizdi. Al 2019 jyldyń qorytyndysy boıynsha ótken qala ákiminiń eseptik kezdesýine shamamen tórt myńǵa jýyq qala turǵyndary qatysty.
Kezdesýler nátıjesi boıynsha aıtylǵan máselelerdi sheshý úshin júzege asyrylatyn sharalardyń josparlary bekitiledi. Aǵymdaǵy jyly onlaın-konferensııalar arqyly azamattardy qabyldaý praktıkasy qolǵa alyndy.