Aqyl-oı alybyn ardaqtady (Polshada Abaıdyń 175 jyldyq mereıtoıyna oraı poshta markasy shyǵaryldy)

Jýyrda «Polıak poshta­synyń» ortalyq ǵımaratynda hakimniń mereıtoıyna oraı «Abaı Qunanbaı­ulynyń tý­ǵanyna-175 jyl» atty posh­ta markasynyń saltanatty ta­nystyrylymy bolyp ótti. Ǵa­lymdar, dıplomattar, posh­ta sala­sy­nyń qyzmetkerleri men BAQ ókil­deri bas qosqan, aqyn murasyn, sonymen qa­tar, halqymyzdyń rýha­nı mádenıetin tanyta túsý ba­ǵy­­tynda uıymdastyrylǵan bul joba­nyń bastamashysy Qazaqstan Respýblıkasynyń Polshadaǵy elshiligi, al ony júzege asyrýshy «Polıak posh­tasy» AQ bolǵandyǵyn atap ótý qajet.

Shara barysynda al­ǵash­qy bolyp sóz alǵan Qa­zaqstannyń Polshadaǵy Tó­tenshe jáne ókiletti elshisi Álim Qırabaev jınalǵan kópshilikke aqynnyń pál­sapalyq ustanymdary, gý­manıstik kózqaras­tary, shy­ǵar­mashylyǵynyń ıdeıa­lyq baǵyty men sıpaty týrasynda aqpa­rat berip, qa­zaq halqynyń Eýropa men Azııa mádenıetterin ja­qyn­­das­tyrýdaǵy, ultymyzdyń rý­hanı álemin kári qur­lyq jurtshylyǵyna tanys­ty­rý­daǵy Adolf Iаnýsh­­kevıch, Gýstav Zelın­skıı jáne Bro­nıslav Zales­skıı syndy polıak zııa­ly­­la­­­rynyń eńbekterin jo­ǵa­ry baǵalaıtynyn atap ótti. Sonymen birge polıak ul­ty­nyń kezekti bir ókili, zań­ger Severın Grosstyń uly Abaımen dostyq baılanys ornatyp, aqynnyń óz ultynyń dástúrli quqyǵyn zerttegen Grossqa taptyrmas keńesshi bolyp, kómek qolyn sozǵandyǵyn tilge tıek etti.

Polıak jáne qazaq tarapynan qatysqan laýazym ıeleriniń sóz sóıleý bólimi aıaqtalysymen taraptar poshta markasy ornalasqan tuǵyrdyń perdesin ashý rásimin júzege asyryp, oǵan Qazaqstan el­shisimen birge «Polıak posh­tasy» AQ tóraǵasy Tomash Zdjıkot jáne PR SIM Shyǵys departamentiniń dırektory Iаn Hofmokl myrzalar qa­tysty. Perde ashylǵan sátte ǵu­lamanyń beınesi jáne onyń tý syrtyndaǵy kıiz úı, máýeli aǵashtar men kók as­pan­nan quralǵan úılesimdi kom­pozısııa alystan kózge jy­ly ushyraı kórindi. «Polıak posh­tasy» mekemesiniń bergen aqparatyna sáıkes 135 myń danamen shyǵarylǵan mar­kanyń ólshemderi: 31,25x39,5 mm. Poshta markasy 30 maý­sym­­nan bastap aınalymǵa shy­ǵarylmaq.

Saltanatty tanystyry­lymnyń resmı bólimi aıaq­­­talǵannan keıin qazaq tarapy sharaǵa qatysyp, aqyn tul­ǵasyna erekshe yqylas bil­dergen qaýymǵa tanymal túrkitanýshy ǵalym, qa­zaq tiliniń bilgiri, professor Henrık Iаnkovskııdiń tár­jimasymen, Qazaqstan elshi­liginiń qoldaýymen bıyl ekin­shi ret basylǵan Abaıdyń «Qara sózderin» syıǵa tartty. Al jınalǵan qaýym bolsa aqynnyń týyndylarynan úzindiler oqyp, onyń ómiri men qyzmeti týraly pikir al­­masty. Osy oraıda Abaı Qu­nan­baıulyn ulyqtaý sharasyna qatysýshy azamattarmen suhbattasyp, pikirin tyńdaǵan edik:

Tomash Zdjıkot, «Polıak posh­­­tasy» AQ tóraǵasy: Biz qazaq tarapymen berik yn­ty­­­maqtastyq ornatqanbyz. Onyń mysaly, 2017 jyly II dú­nıe­­júzilik soǵys jyldary Orta­lyq Azııada jasaqtalǵan polıak áskerin este saqtaý maq­satynda «Anders áskeri – úmit izi» atty poshta marka­syn birlese shyǵarǵan bo­la­tynbyz. Al búgingi «Abaı Qu­nanbaıulynyń tý­ǵany­na-175 jyl» poshta markasyn sal­tanatty túrde tanystyryp otyr­myz. Bul biz úshin úlken már­tebe!

Iаn Hofmokl, PR SIM Shy­­­ǵys departamentiniń dı­­­rektory: HIH ǵasyrda ómir súr­gendigine qaramastan Abaı, qaıta órleý kezeńiniń adamy syndy jan-jaqty, shyn má­nindegi segiz qyrly bir syr­­ly tulǵa bolǵandyǵyn bi­le­miz. Árıne aqyndyq – Abaı­­dyń bir qyry ǵana. Biz qa­zaq aqynynyń óleń shý­­­maq­tarymen qatar áýenin kel­­tirgen sazgerlik ónerinen de habardarmyz. Deıturǵanmen, Abaı shyǵarmashylyǵynda onyń qara sózderiniń orny erekshe. О́ziniń Qazaqstanǵa sapary barysynda Rım Pa­pa­sy Ioan Pavel II Abaı Qu­­­nan­baıulynyń qara sóz­de­rinen úzindi oqyǵan bolatyn. Jalpy, ǵulamanyń qara sóz­derin árdaıym basshylyqqa alǵan jón dep bilemin. Men bala kezimnen poshta markalaryn jınaýmen áýestendim. Osy sátti paıdalana otyra atalǵan birlesken jobany jú­­zege asyrýshy talaptarǵa al­­ǵysymdy bildiremin.

Jandos Áýelbekuly,

arnaıy «Egemen Qazaqstan» úshin

Varshava (Polsha)