Qytaı dárigerleri estigen adamdy esten tandyratyn taǵy bir ózgeshe operasııa jasap shyqty. Bul joly olar adamnyń betin keýdesine ornatyp berdi. Osy týraly habarlaǵan Segodnya.ua agenttigi dárigerlerdiń bul qadamǵa eksperıment retinde barǵanyn da jazady.
Eldiń ońtústik-shyǵysyndaǵy Fýszıan provınsııasynda qarapaıym otbasynan shyqqan 17 jasar Sıýı Dzıanmeı esimdi qyz budan 12 jyl buryn, 5 jasynda betin kúıdirip alǵan eken. Sol zardaptan onyń ıegi, qabaǵy men oń qulaǵy qatty zaqymdanypty. Biraq 10 jyl boıy qyzdyń ata-anasy onyń emdelýine qajetti qarajat tappaı qınalyp kelgen. Sondyqtan olar ótken jyly dárigerler tarapynan bolǵan usynysqa amalsyz táýekel etken. Bir jaqsysy, ota aıtarlyqtaı sátti jasalǵan. Nátıjesinde qyzdyń keýdesine jańa bet qondyrylǵan.
Bul óte kúrdeli operasııa eki kezeńmen júrgizilgen. Dárigerler birinshi qyzdyń jambasynan teri alyp, ony sol ıyǵynyń tómen jaǵyna ornatady. Sosyn jańa teri ósip, tolyq qalyptasyp bolǵan soń dárigerler ony qyzdyń betine tigip beredi.
Qytaıda buǵan uqsas taǵy bir operasııa osynyń aldynda jasalǵan bolatyn. Sol joly Aspan asty eliniń tábıbteri jol apatynan jaraqat alǵan jas jigitke jańa muryn qoıyp bergen edi.
Aıdar О́risbaev.