Nursultan Nazarbaev "Astana Bas jospary» ǵylymı-zertteý jobalyq ınstıtýty" jaýapkershiligi shekteýli seriktestiginde boldy, dep habarlaıdy Egemen.kz Elbasynyń baspasóz qyzmetine silteme jasap.
Nur-Sultan qalasynyń ákimi Altaı Kólginov Qazaqstannyń Tuńǵysh Prezıdentine qalanyń áleýmettik-mádenı nysandarynyń qurylysy, ınfraqurylymdy jańǵyrtý, abattandyrý jáne ómir súrýge qolaıly jaǵdaı jasaý salasyndaǵy mindetterdi kezeń-kezeńimen júzege asyrý josparyn usyndy.
Nursultan Nazarbaev jańa Qazaqstannyń nyshanyna aınalǵan elordanyń damýyna árdaıym erekshe mán beretindigin atap ótti.
"Jıyrma eki jyldyń ishinde elorda ákimshilik, iskerlik, ekonomıkalyq, mádenı jáne saıası ortalyqqa aınaldy. Bastapqy bas josparlarda qala turǵyndarynyń sanyn 1 mıllıon 200 myń adamǵa jetkizý 2030 jylǵa qaraı kózdelgen edi. Bul kórsetkishke 10 jyl buryn erte jettik. 1997 jylmen salystyrǵanda qala halqynyń sany tórt ese ósti", – dedi Elbasy.
Sondaı-aq Nursultan Nazarbaev elordanyń ekonomıkalyq damýyn atap ótti.
"Jalpy, 22 jyldyń ishinde jańa astananyń damýyna memleketten bólingen árbir 1 teńge respýblıkalyq bıýdjetke 2,8 teńge bolyp qaıtaryldy. Bes jyldan beri bas qala respýblıkalyq bıýdjet donory aımaqtarynyń qatarynda", – dedi Elbasy.
Sonymen birge shaǵyn jáne orta bıznes, qurylys salasy elordanyń damý draıverine aınalǵany atap ótildi.
"Qala ekonomıkasynyń 55 paıyzyn shaǵyn jáne orta bıznes quraıdy. Jyl saıyn 20 myńnan astam jańa jumys orny qurylady, onyń 70 paıyzy shaǵyn jáne orta bızneske tıesli. Sonymen qatar elorda qurylys sektorynyń kóshbasshysy. 1997 jyldan beri 26 mıllıon sharshy metrden astam turǵyn úı paıdalanýǵa berildi", – dedi Qazaqstannyń Tuńǵysh Prezıdenti.
Osy jyldardyń ishinde elorda bilim berý habyna, mádenı ortalyqqa jáne medısına klasteri damyǵan qalaǵa, sondaı-aq Qazaqstannyń barlyq óńirlerin biriktirý arqyly mańyzdy kólik jáne tranzıttik habqa aınaldy.
Nursultan Nazarbaev elordanyń damý jolynda jetistiktermen qatar, azamattardy tolǵandyratyn máseleler de bar ekenin atap ótti. Olardyń ishinde – úleskerleri bar qurylysy aıaqtalmaǵan turǵyn úıler; úsh aýysymdaǵy jáne oqýshylar sany kóp mektepter; jaýyn sý aǵatyn káriz júıesi; qoǵamdyq qaýipsizdik máseleleri jáne taǵy basqalary.
"Elorda ákimdigi máselelerdi únemi baqylaýda ustap, azamattardyń ótinishine jedel jaýap berýi kerek", – dedi Qazaqstannyń Tuńǵysh Prezıdenti.
Sonymen qatar Elbasy elorda basshylyǵynyń aldynda Úkimetpen birge turǵyndar men qonaqtardyń jaıly ómir súrýi úshin qalanyń ınfraqurylymyn jaqsartý boıynsha bas jospar men damý josparyn júzege asyrý mindeti turǵanyn atap ótti.
"Jalpy, men strategııalyq mindetterdi sheshýdi qamtıtyn damý josparyn qabyldaımyn. Elorda ómir súrýge jáne iskerlik belsendilikke qolaıly qala retinde damı berýi kere", – dedi Nursultan Nazarbaev.
Sońynda Premer-Mınıstrdiń orynbasary Eraly Toǵjanov Qazaqstannyń Tuńǵysh Prezıdentine Túrkistan qalasynda salynyp jatqan Qazaq handyǵynyń tarıhyna arnalǵan memorıal jobasymen tanystyrdy.