Jyldyń alǵashqy toqsanynda Qazaqstan ekonomıkasy turaqty ósim kórsetip, negizgi draıverler retinde qurylys, kólik jáne óńdeý ónerkásibi alǵa shyqty. Ulttyq ekonomıka mınıstrliginiń derekterine sáıkes, qańtar − naýryz aılarynda IJО́-niń naqty ósimi 3% boldy, dep habarlaıdy Egemen.kz.
Úkimet otyrysynda baıandama jasaǵan Azamat Ámrın málimetinshe, qyzmet kórsetý salasy 3,7%-ǵa ósse, naqty sektordaǵy ósim 2,1%-dy qurady. Bul ekonomıkanyń ártarapty damyp kele jatqanyn ańǵartady.
Salalar bólinisinde eń joǵary ósim qurylys – 14,8%, kólik qyzmetteri – 12,8% jáne óńdeý ónerkásibi – 8,5% deńgeıinde tirkeldi. Bul baǵyttardaǵy qarqyn el ekonomıkasynyń serpindi damýyna negiz bolyp otyr.
Shıkizattan daıyn ónimge: Ekonomıkanyń jańa modeli
Syrtqy saýdada da oń úrdis saqtalǵan. Jyldyń alǵashqy eki aıynda taýar aınalymy $21,7 mlrd-qa jetip, onyń ishinde 2,4 mlrd dollar oń saldo qalyptasty.
«О́tken jyly ekonomıkadaǵy óńdeý ónerkásibiniń úlesi 12,7%-ǵa deıin ósti, osylaısha ekinshi jyl qatarynan taý-ken ónerkásibiniń (2025 jyly – 11,9%) deńgeıinen asyp túsip otyr. IJО́-degi munaı sektorynyń úlesi 2 ese qysqardy. 2010 jyly ol 16,5% bolǵan bolsa, 2024 jyly 8,1%-ǵa deıin tústi. Turaqty damýdy qamtamasyz etý úshin ekonomıkany odan ári ártaraptandyrýǵa basa nazar aýdarý qajet, bul «ortasha tabys tuzaǵynan» shyǵýǵa múmkindik beredi», dedi Azamat Ámrın.
Jalpy, óńdeý sektoryn kúsheıtý men ınfraqurylymdyq salalardy damytý ekonomıkanyń sapaly ósimine jol ashyp, uzaqmerzimdi turaqtylyqty qamtamasyz etýge baǵyttalyp otyr.
El ekonomıkasyna 3,5 trln teńge ınvestısııa salyndy