Astanadaǵy S.Seıfýllın murajaıynda uly hakim Abaıdyń 165 jyldyǵyna oraılas ádebı-mýzykalyq shara bolyp ótti.
Elbasy Abaıdyń 150 jyldyq mereıtoıynda sóılegen sózinde: álemge qazaqty tanytý úshin Abaıdy taný kerek degen edi. Osy tapsyrmany iske asyrýda salǵyrttyq basym sııaqty. Degenmen Abaı murasymen júıeli túrde jumys jasap kele jatqan uıymdar da bar ekendigin joqqa shyǵarýǵa bolmaıdy. Máselen, halyqaralyq “Abaı” qory. Áıtse de mundaı qoǵamdyq uıymdardyń qarymy qysqa. Demeýshilerdiń bólgen qarjysymen kún kóretindigin alǵa tartqan “Abaı” qorynyń prezıdenti, QR eńbek sińirgen qyzmetkeri Baltabek qajy Báziluly qordyń qalypty jumys isteýi úshin jylyna 5 mln.teńgedeı aqsha qajettigin jetkize otyryp, muny respýblıkalyq bıýdjetke engizý durys bolar edi degen tilegin de bildirdi.
Sondaı-aq ol Abaıdyń 165 jyldyq toıy 4 aı buryn, eń bastysy el ortalyǵy Astana qalasynda bastalýynda da úlken mán jatqandyǵyn aıtty. 1990 jyly qurylǵan qorǵa búginde 20 jyl tolyp otyr eken.
Keshte Abaı ánderi shyrqalýmen qatar, birqatar qordalanyp qalǵan máseleler de aıtyldy. Mysaly, Abaıdyń qara sózderiniń oryndarynyń aýysýy, danyshpannyń murasynyń jınaqtalýy jaıynda sóz qozǵaldy.
Baltabek qajy Ersálimov bizben kókeıinde júrgen keıbir oılarymen de bólisti. Atap aıtsaq, túrki halyqtary arasynda Abaı atyndaǵy halyqaralyq syılyq bolsa onyń dúnıejúzine tanyla túsýine qyzmet etpes pe edi?
Stýdentterge Abaı atyndaǵy syılyq taǵaıyndasa da artyqtyq etpeıdi. Mine, osy sekildi kóptegen máselelerdi kótergen ádebı-mýzykalyq keshti abaıtanýshy ǵalym Asan Omarov júrgizdi.
Venera TÚGELBAI.