1 qazan – qarttar kúni Sherhan Murtaza atyndaǵy «Rýhanııat jáne tarıhtaný» ortalyǵynda ardagerlerge qurmet kórsetildi. Merekege Uly Otan soǵysynyń ardagerleri, túrli salanyń eńbek sińirgen qyzmetkerleri, oblystyń jáne qalanyń Qurmetti azamattary shaqyryldy, dep habarlaıdy Egemen.kz.
Jambyl oblysynyń ákimi Berdibek Saparbaev jınalǵandardy merekemen shyn júrekten quttyqtap, zor densaýlyq, kóterińki kóńil, uzaq ómir tiledi.
- Sizder tiri shejiresizder jáne biz úshin danalyqtyń qaınar kózisizder! Qarttar kúni – bul ardagerlerdi qamqorlyqpen jáne meıirimge bóleýdiń tamasha sáti. Biz sizderdiń árbirińizdiń qajyrly eńbekterińiz ben jetistikterińizdi úlgi tutamyz. Jańa urpaqtyń beıbitshilikte baqytty ómir súrýi jolynda aıanbaı baryn salǵan ardagerlerdiń erligin eshqashan umytpaımyz. Sizderdiń oblys ekonomıkasyn damytýǵa qosqan úlesterińiz orasan zor. Sizderdiń kópshiligińiz jaýapty basshylyq qyzmetterde eńbek etip, jas mamandarǵa tálimger bola bildińizder, - dedi oblys ákimi.
Berdibek Saparbaev zeınet demalysyna shyqqan ardagerlerdiń qoǵamdaǵy beıbitshilik pen kelisimdi saqtaýǵa óz úlesterin qosyp júrgenin atap ótti. Olar ózderiniń ómirlik tájirıbelerin bólise otyryp, jastardy durys jolǵa baǵyttap keledi.
- Táýelsizdik jyldary Qazaqstan ekonomıkasy men demokratııalyq negizi damyp kele jatqan qýatty memleketke aınaldy. Bul úshin biz aǵa býyn aldynda qaryzdarmyz. Men únemi aıtyp kelemin, jastar ózderine ómir syılaǵan, tárbıe men bilim bergen úlkenderdi umytpaýy tıis. Qart adamdarǵa qurmet pen qamqorlyq tek osyndaı mereke kúnderi ǵana emes, únemi kórsetilýi kerek, - dep atap ótti aımaq basshysy.
Memleket ardagerlerge árdaıym qamqorlyq tanytyp, olardyń eshteńege muqtaj bolmaýy úshin tıisti jaǵdaı jasap otyrǵandyǵyn da basa aıtty.
- Prezıdent Qasym-Jomart Toqaev Qazaqstan halqyna Joldaýynda kútiletin ómir súrý uzaqtyǵyn 75 jasqa deıin jetkizý úshin densaýlyq saqtaý salasyn odan ári damytý boıynsha sharalar qabyldaýdy tapsyrdy. Búginde bizdiń oblysymyzda 100 jastan asqan 20 ardager jáne 90 jastan asqan 1085 zeınetker turady, - dep Berdibek Saparbaev naqty derektermen bólisti.
Oblystyq ardagerler keńesiniń tóraǵasy Erkinbek Soltybaev ardagerlerge salaýatty ómir saltyn nasıhattaý jáne óskeleń urpaqty qazaqstandyq patrıotızm rýhynda tárbıeleýdegi orasan zor jumystary úshin alǵys aıtty.
Áńgime barysynda bastan keshken qıyndyqtar, áskerı erlikter, jetistikter, rýhanı qundylyqtar týraly aıtyldy. Ardagerler jyly lebizderin bildirip, súıikti ánderin shyrqady.
Ardagerler oblys basshylyǵyna iltıpaty men olarǵa degen qurmeti úshin rızashylyqtaryn bildirdi.
- Uzaq jyldar boıy óńirdiń ıgiligi jolynda eńbek etken qarııalarǵa kóp kóńil bólinedi. Búgingi merekege oraı kezdesý uıymdastyryp, erkin áńgime quryp, ótkenimizdi eske túsirip, bir serpilip qalýǵa múmkindik bergenderińiz úshin rahmet, - dedi jýrnalıstıka ardageri, Qazaqstan Respýblıkasynyń eńbek sińirgen qaıratkeri Battal Jańabaıuly.
Kezdesýge qatysýshylar túrli máseleler boıynsha oılaryn ortaǵa saldy. Olar oblys ortalyǵy adam tanymastaı ózgergenin tilget tıek etip, kóne Taraz týrısterd úshin tartymdy ortalyqqa aınalatyndyǵyna senim bildirdi.
Sondaı-aq jınalǵandar ózderin tolǵandyryp júrgen máselelerdi jetkizdi. Oblys ákimi barlyǵyn muqııat tyńdap, olardy sheshýge ýáde berdi.
Sondaı-aq bul kúni Berdibek Saparbaev Ardagerler úıine at basyn buryp, ardagerler keńesiniń jumysymen tanysty.